Kapasitashon di ‘Téknika di Benta’ ta inspirá empresarionan ku konosementu práktiko
Kralendijk, 30 di òktober 2025 – Kámara di Komèrsio Boneiru riba djárason anochi 29 di òktober na Kaya Amsterdam 23, a organisá un edishon eksitoso di The Next Step – E Siguiente Paso, un serie di kapasitashon dentro di e programa di Sentro pa Empresariado (SpE). E enkuentro, ku komo tema ‘Téknika di Benta’, a atraé mas òf ménos 30 empresario entusiasmá – konsistiendo di tantu partisipantenan na e programa komo otro interesadonan.
E konsehero empresarial Jian Magdalena a kondusí e seshon, ku sosten di e eksperto di merkadeo i benta Sander Regien. Den e promé parti e presentenan a haña un splikashon klarito di e proseso di benta i e prinsipionan básiko di aserkamentu efektivo di kliente. E di dos parti tabata den signo di práktika i interakshon, ku komo wéspetnan spesial Aimed Ayubi (doño di Radio Live99 FM) i Garcin Keller (doño di Gartish Tegelwerk). Nan a kompartí nan vishonnan i eksperensianan personal tokante edifikashon di relashonnan duradero ku kliente i emprendimentu eksitoso na Boneiru.
E partisipantenan a reakshoná na un manera entusiasmá riba e kombinashon di teoria i práktika. ‘Esaki ta un di e hopi seshonnan ku nos ta organisá den The Next Step – E Siguiente Paso,’ asina Jian Magdalena ta splika. ‘Nos ta invitá empresarionan tambe ku ainda no ta partisipá pa tuma kontakto ku Kámara di Komèrsio, di manera ku huntu nos por wak kon nos por sostené nan ku kresementu di nan empresa.’
Kámara di Komèrsio Boneiru a ekspresá su apresio pa e esfuerso di Sander Regien, Aimed Ayubi i Garcin Keller, ku pa medio di nan kontribushon a hasi e anochi un éksito inspirativo.
E kapasitashon di ‘Téknika di Benta’ ta forma parti di e programa The Next Step – E Siguiente Paso ku ta intenshoná pa empresarionan (semi) avansá ku ke laga nan empresa sigui krese. Pa medio di coaching, mentoría i seshonnan dirigí di informashon i kapasitashon, e programa ta sostené empresarionan den nan desaroyo profeshonal. The Next Step – E Siguiente Paso ta un inisiativa di Sentro pa Empresariado, un laso di kolaborashon entre Kámara di Komèrsio Boneiru, Ministerio di Asuntunan Ekonómiko i Klima (EZK) i Servisio di Reino pa Hulanda Empresarial (Rijksdienst voor Ondernemend Nederland – RVO).