KdK Boneiru ta inspirá studiantenan di MBO ku tayer tokante empresariado i formanan hurídiko

Resientemente Kámara di Komèrsio Boneiru (KdK Boneiru) a organisá un tayer informativo pa studiantenan di MBO Nivel 3 Bienestar. Durante e enkuentro akí e studiantenan a haña informashon balioso tokante diferente forma hurídiko i tokante e posibilidatnan ku empresariado por ofresé pa un futuro karera.

Meta di e tayer tabata pa hasi hóbennan konsiente di e oportunidatnan ku tin pa kuminsá ku un propio empresa. E studiantenan a sera konosí ku e diferente formanan hurídiko i nan a haña un bista di e pasonan ku ta nesesario pa lanta un kompania.

Banda di esaki a papia tambe tokante e Sentro pa Empresariado (Centrum voor Ondernemerschap – CvO). E studiante a haña informashon tokante e guia i sosten ku e Sentro pa Empresariado ta ofresé na empresarionan ku ta kuminsando. E sosten akí por yuda hóbennan ku desaroyo di nan propio ideanan pa un empresa i ku lantamentu eksitoso di un propio negoshi.

Ku e tayer akí KdK Boneiru ta suprayá su kompromiso pa laga hóbennan sera konosí tempran ku empresariado. Pa medio di informashon i aktividatnan edukativo KdK Boneiru ke stimulá hóbennan pa pensa tokante e posibilidatnan di hasi negoshi independientemente i hasi nan konsiente di e sosten disponibel.

Segun direktor di Kámara di Komèrsio di Boneiru (KvK Bonaire), Phar Martha, tradishonalmente mayornan tabata manda nan yu skol ku e meta di stimulá nan pa despues por haña un bon trabou. Sin embargo, e idea di studia ku e meta di bira un empresario eksitoso tabata risibí ménos atenshon.

Pa e motibu ei, KvK Bonaire ta sigui komprometé su mes ku organisashon di workshopnan pa informá, inspirá i guia hóbennan. Dor di e inisiativanan aki, nan ta keda mihó prepará pa hasi uso di e oportunidatnan ku emprendementu ta ofrese i pa kontribuí aktivamente na desaroyo ekonómiko di Boneiru.

Mas informashon? Manda un email na bis@kvkbonaire.com òf pasa un ratu na Kaya Amsterdam 23. Nos ta habrí nòn stòp for di 08.00 or te 15.00 or. Yama tambe ta posibel: 717 5595.