KICK-OFF KvK Academy 2025: Un komienso hopi prometedor pa empresarionan nobo

Riba djaweps 21 di ougùstùs e KICK-OFF di KvK Academy 2025 a tuma lugá na e bunita sitio Isidel Beach Park. Durante e momentu di apertura e treinernan a yama e kursistanan nobo bon biní i a informá nan tokante e diferente módulonan ku den e lunanan binidero nan ta bai sigui.

For di otro siman KvK Academy ta ranka sali ofisialmente:

· Djamars 26 di ougùstùs e grupo ku ta papia papiamentu ta kuminsá ku 20 kursista.

· Djárason 27 di ougùstùs e grupo ku ta papia hulandes ta sigui, tambe ku 20 kursista.

KvK Academy ta ofresé e partisipantenan un trayekto kaminda nan ta fortifiká nan abilidatnan empresarial, atkerí konosementu nobo i traha na un manera práktiko riba nan propio plan di negoshi. Rònt di 14 di novèmber 2025 nan ta finalisá e programa ku un ‘Tanki di Tribon – Shark Tank’, kaminda e partisipantenan ta presentá nan ideanan na un hurado eksperto.

KvK Academy su meta ta pa fortifiká empresariado na Boneiru i ku esaki duna un aporte pa hasi ekonomia di Boneiru mas fuerte. E lema di KvK Academy ta representá e 3 E-nan: Edukando i Empoderando Empresarionan. Dosentenan wéspet di diferente instituto na Boneiru i empleadonan di Kámara di Komèrsio ta kapasitá e partisipantenan na e kurso pa loke ta trata abilidatnan empresarial esensial.