Komienso eksitoso di Sentro pa Empresariado

Dia 21 di ougùstùs último Kámara di Komèrsio i Industria Boneiru a ranka sali eksitosamente ku e ‘Sentro pa Empresariado’ nobo durante un simposio na Delfins Beach & Resort Bonaire. Durante e enkuentro a duna splikashon tokante e sentro i tokante e sistema ku ta usa pa duna guia den un forma mas intensivo na empresarionan nobo na komienso di nan empresa. E diferente organisashonnan ku ta hunga un ròl direkto den esaki a splika kiko nan por nifiká pa e empresarionan akí.

Ministerio di Asuntunan Ekonómiko i Servisio di Reino pa Hulanda Empresarial (Rijksdienst voor Ondernemend Nederland – RVO) a duna un enkargo pa desaroyá un programa di empresariado ku ta duna sosten na empresarionan ku ta kuminsá, i a finansiá esaki. Pa esaki a pone un kontribushon tambe disponibel for di e ministerio. E programa mester sòru pa serka empresarionan ta mas konosí kua ta e yudansa ku nan tin mester i kua ta e abilidatnan ku nan tin ku desaroyá pa disponé di un empresa viabel. E ora ei por ofresé yudansa grátis riba tereno di finansiamentu, konosementu, pèrmit, supsidio i impuesto. Nan por sigui desaroyá e abilidatnan akí mas aleu pa medio di hasi uso di ‘voucher’ pa treinen, kurso i ‘coaching’.

Un di e desafionan mas grandi ku empresarionan ta konstatá, ta e falta aktual di un ekosistema koherente pa empresariado na Boneiru. E Sentro pa Empresariado ta bai sòru ku ta bini mas atenshon pa e aspektonan mas importante di esaki durante komienso di e empresa. Pa e motibu akí un kantidat grandi di organisashon ta traha huntu riba un mihó dunamentu di guia na empresarionan. Esakinan ta entre otro Servisio di Reino pa Hulanda Empresarial, Servisio di Impuesto Hulanda Karibense, Servisio di Imigrashon i Naturalisashon, Entidat Públiko Boneiru, Qredits, e notarionan i e Ofisina di Benelux pa Propiedat Intelektual (Benelux Office for Intellectual Property). Ta wak tambe kon e Sentro pa Empresariado i Businesspark por fortifiká otro mas aleu pa medio di kolaborashon i interkambio.

Banda di esaki tin nesesidat tambe pa un ret strukturá di empresario na Boneiru. E intenshon ta pa krea un ret strukturá, kaminda e empresarionan eksitoso por asumí un ròl di mèntòr tambe. Mas aleu empresariado lo keda promové pa medio di pone empresarionan eksitoso den spòtlait. Premio i apresio pa empresariado ta un bunita manera pa hasi esaki konosí serka un públiko mas amplio.