Konbenio di kolaborashon entre Kámara di Komèrsio Boneiru i Business Federation Bonaire

Kámara di Komèrsio Boneiru (KvK) i Business Federation Bonaire (BFB) ta bai traha mas intensivamente huntu ku otro. Pa esaki ámbos organisashon a sera un konbenio ku otro, ku e presidentenan di e dos organisashonnan a firma riba djaweps 24 di novèmber. Ku e konbenio akí ámbos organisashon ke fortifiká Boneiru su kapasidat empresarial.

A base di nan organisashon tur dos partido tin un ròl ku ta parsialmente igual pa loke ta trata temanan sosial ekonómiko den Diálogo Sentral i den konsulta ku e diferente gobièrnunan. E partidonan ta hasi palabrashon ku otro pa tene konsulta periódikamente, tene otro na altura di e desaroyonan i buska sinkronisashon den kaso di atendementu ku interes di empresario. Tambe konhuntamente nan ta bai formulá un programa anual pa por sinkronisá nan aktividatnan mas mihó ku otro. Finalmente regularmente e partidonan lo tene konsulta konhunto i nan aspirashon ta pa hasi esaki periódikamente ku gobièrnu lokal i otro instansianan relevante tambe.

Den e konbenio a inkluí tambe ku konhuntamente e partidonan lo nombra un komishon pa por analisá i investigá problemanan spesífiko den e área sosial ekonómiko mas aleu.

Kámara di Komèrsio ta manehá Registro Komersial i tin un tarea legal pa stimulá ekonomia di Boneiru pa medio di investigashon, konsulta i kolaborashon. Business Federation Bonaire ta e relashon di kolaborashon entre dunadónan di trabou na Boneiru i su aspirashon ta pa mediante kolaborashon yega na un Boneiru próspero i sostenibel.