Kontribushon for di EZK tambe pa empresario na Hulanda Karibense

Empresarionan afektá pa e medidanan den konekshon ku vírùs di corona i ku tin gastunan fiho haltu, por bini na remarke for di awe pa un kompensashon di Ministerio di Asuntunan Ekonómiko i Klima (Economische Zaken en Klimaat, EZK). E kompensashon aki, antes yama “Noodloketregeling” ta un pago di un solo biaha di $ 4.400.

E kompensashon ta intenshoná pa empresarionan ku ta aktivo na Boneiru, Saba òf Sint Eustatius ku ta antisipá pèrdida di benta di minimo $ 4.400 den e periodo di 13 di mart 2020 te ku 12 di yüni 2020, miéntras nan gastunan fiho ta mínimo $ 4.400 durante e mesun periodo. Bou di gastunan fiho ta kai por ehèmpel gastunan di e edifisio di negoshi, seguro i finansiamentu. Impuesto, primanan di dunadó di trabou i gastunan laboral no ta konta komo gastu fiho. Pa gastunan laboral por hasi un apelashon riba e areglo di emergensia di SZW.
E unidat SZW di RCN ta bai ehekutá e areglo aki. Ta posibel pa bini na remarke pa tantu e areglo di emergensia di SZW komo pa e kompensashon di EZK.

E kondishonnan i formularionan di aplikashon pa e kompensashon aki ta disponibel riba https://papiamentu.rijksdienstcn.com/covid-19/pakete-di-emergensia/kompensashon-ezk. Por entrega formularionan kompletamente yená i firmá te ku mas tardá 12 di yüli 2020 via di e e-mail tegemoetkomingEZK@rijksdienstcn.com.

Pa ayudo ku aplikashon por tuma kontakto via di telefòn ku unidat SZW di RCN via 781-5558 (Boneiru) òf 319 5693 (Sint Eustatius i Saba). Empresarionan na Boneiru ku mester informashon tokante e KONTRIBUSHON FOR DI EZK por manda un meil na steunloket@kvkbonaire.com.