KvK Academy 2026 a ranka sali ofisialmente ku un anochi di informashon

KvK Academy 2026 a ranka sali ofisialmente ku un anochi di informashon pa tur partisipante ku a inskribí. Durante e enkuentro akí a yama bon biní na e partisipantenan i nan a haña un promé introdukshon di e programa ku den e lunanan binidero ta bai guia nan den nan desaroyo komo empresario.

E aña akí tambe e interes pa KvK Academy ta grandi. En total 40 empresario (aspirante) ta bai partisipá na e trayekto: 20 partisipante den e grupo di idioma papiamentu i 20 partisipante den grupo di idioma hulandes.

Durante e anochi di informashon a duna un splikashon kòrtiku di e trayekto i di struktura di e kurso. E partisipantenan a haña un bista general di e 11 módulonan ku lo keda tratá durante e programa. Banda di esaki a revelá djis un parti chikitu di e Tanki di Tribon (Shark Tank), e presentashon final kaminda e partisipantenan ta presentá nan empresa i e konosementu ku nan a optené durante e trayekto.

E promé lèsnan ta tuma lugá riba djamars 25 di ougùstùs pa e grupo di idioma papiamentu i riba djaweps 27 di ougùstùs pa e grupo ku ta sigui e kurso na hulandes.

Ku un Academy kompletamente okupá i un grupo di partisipante entusiasmá, Kámara di Komèrsio i Industria Boneiru ta spera algun siman inspirativo i eksitoso, kaminda ta sostené e partisipantenan na momentu di fortifiká nan empresa i laga esaki krese, i ta deseá tur partisipante hopi éksito.

Pa mas informashon bo por yama 717 5595 òf bo por bishitá nos wèpsait www.bonairechamber.com. Ta posibel tambe pa pasa personalmente na Kaya Amsterdam 23. Nos ta habrí nònstòp for di 08.00 or te 15.00 or.

Emailadrès: bis@kvkbonaire.com