Jul 18
Notisia

KVK Academy a ranka sali!

Dia 14 di yüli último Kámara di Komèrsio Boneiru a tene un eksitoso evento ‘live’ tokante KvK Academy ku mas ku 100 siguidó. Den e evento akí a duna splikashon tokante kiko KvK Academy ta enserá. KvK Academy ta ranka sali dia 23 di ougùstùs 2022, tantu na papiamentu komo na hulandes, den kaso ku tin sufisiente inskripshon.

Den e evento ‘live’ a duna informashon amplio tokante e módulonan ku ta parti di e programa i a duna un bista di e sistema di traha. E kuríkulo ta kontené e siguiente partinan:

  1. Ken ta mi kliente
  2. My Value Proposition
  3. Merkadeo i komunikashon
  4. CRM – Relashon ku kliente
  5. Fluhonan di entrada
  6. Key Resources
  7. Pitch
  8. Huntu nos ta fuerte
  9. Finansiamentu
  10. Impuesto
  11. Plan di negoshi

Empresarionan ku ainda ke partisipá por registrá via bis@kvkbonaire.com e di online form. E suma di inskripshon pa partisipashon na e kurso ta $100,–. Pa esaki e partisipantenan ta haña e kurso kompleto, un enkuentro di introdukshon, un tarea final i un sertifikado despues ku e kurso terminá. Ta duna e kurso dos biaha pa siman den oranan di anochi i tin ora riba djasabra den e sala di treinen di Kámara di Komèrsio na Kaya Amsterdam 23.

Meta di KvK Academy ta pa fortifiká empresariado na Boneiru i ku esei duna un aporte na foritifikashon di ekonomia di Boneiru. E lema di KvK Academy ku ta para pa 3 E, ta: Educating & Empowering Entrepreneurs – Eduká i Empoderá Empresarionan. Dosentenan wéspet di vários instansia na Boneiru i empleadonan di Kámara di Komèrsio lo rekapasitá e partisipantenan na e kurso pa loke ta trata abilidatnan esensial di empresario. KvK Academy ta un programa ku Kámara di Komèrsio Boneiru a desaroyá. Ministerio di Asuntunan Ekonómiko i Klima a sostené i supsidiá desaroyo di e programa na aña 2019 i 2020. A usa e supsidio akí pa desaroyo di e kurso i produkshon di material di lès. Danki na e kontrato di kuido ku Entidat Públiko Boneiru, Kámara di Komèrsio por ripití e kuríkulo akí durante aña 2021.

Mas informashon tokante KvK Academy ta disponibel riba wèpsait di Kámara di Komèrsio www.kvkbonaire.com òf riba e pagína di facebook Bonaire Chamber of Commerce and Industry.