KVK i TCB ta traha huntu riba inovashon
Dia 23 di ougùstùs 2023 Kámara di Komèrsio Boneiru (KVK) i Tourism Corporation Bonaire (TCB) a anunsiá e ‘Tourism Innovation Project – Proyekto di Inovashon di Turismo’. E inisiativa akí ta un laso di kolaborashon entre KVK i TCB komo parti di un deklarashon di intenshon ku nan a firma konhuntamente. E inisiativa ta enserá un kuríkulo ku mester sòru ku empresarionan ku ta kuminsando, pero prinsipalmente empresarionan eksistente, ta siña abilidatnan nobo pa inová nan empresa i nan produktonan i servisionan. Pa motibu di grandura di nos sektor turístiko, pa esaki TCB ta e partner mas lógiko pa KVK.
E Proyekto di Inovashon di Turismo ta un invitashon pa reimaginá, reinventá i redefiní turismo na e Boneiru ku nos stima. Ku un vishon oudas den mente, e proyekto ta purba deskubrí konseptonan inovativo ku lo transformá e manera ku nos bishitantenan ta eksperensiá nos isla.
Empresarionan aspirante, empresanan establesé i interesadonan pashoná tur ta bon biní pa partisipá. Sea ku bo tin un idea ku awor akí ta hañando forma òf bo tin un konsepto bon desaroyá i ku ta kla pa keda eksponé, e proyekto ta e plataforma pa fortifiká bo vishon i kontribuí na kresementu di nos sektor turístiko lokal.
Despues di nan registrashon e partisipantenan ta kuminsá ku un tayer obligatorio ku a keda diseñá pa refiná nan ideanan i pa mehorá nan abilidat di presentashon. E fase akí ta forma e base pa e gran final: un evento den estilo di un ‘Shark Tank’. Un komishon di ekspertonan i profeshonalnan lokal lo evaluá kada proyekto i su potensial impakto. E ganadó final ta haña un invershon konsiderabel di $ 10.000 pa duna bida na nan konsepto turístiko vishonario.
Registrashon pa e proyekto ta habrí awor akí i nos ta urgi tur kandidato ku ta interesá pa tuma akshon rápidamente. E trayekto ta kuminsá ku yenamentu di e formulario di registrashon, ku bo ta entregá huntu ku otro dokumentunan esensial, manera un sédula, un CV òf un resúmen personal i un karta di motivashon den kua bo ta splika e idea ku bo ta proponé. E dokumentunan akí lo sirbi komo base pa evaluashon di potensial di kada produkto òf servisio pa duna forma na futuro di e paisahe turístiko di Boneiru.