Loke bo siña komo hóben, bo ta hasi ora bo bira grandi (mucha tambe por ta empresario)

Den kuadro di stimulá i inspirá empresariado serka hòben, Kámara di Komèrsio i Industria Boneiru e aña akí un biaha mas a partisipá na ‘Buki di Prèt’. Resientemente nos tabatin bishita di un grupo di hóben entre 9 i 13 aña i nos a informá nan tokante diferente faseta di empresariado.

Pa medio di tira lus riba diferente aspekto di empresariado nos a laga e muchanan mira kon plasentero por ta ora bo mes ta doño di bo propio negoshi. Durante e mainta akí komo inspirashon nos a invitá tres empresario hóben:

• Shemaya Evertsz, 10 aña, di ‘H&L Indulgence’ (‘personal cakes’, kos di boka dushi i artesania ku e mes ta traha).
• Nishanthalie Molina, 11 aña, di ‘Always Glow’ (produkto di kosmétiko ku e mes ta traha).
• Selishah Agostien, 13 aña, di ‘Selis Cupcakes’ (bolo i ‘cupcake’ ku e mes ta traha).

Nan a konta kon nan a kuminsá ku nan negoshi, kiko nan a eksperensiá te ku awor i kiko ta nan plannan pa futuro. A splika e muchanan ku un negoshi entre otro ta reakshoná aktivamente riba nesesidatnan spesífiko di un grupo òf ta solushoná un problema.

Bou di guia di Kámara di Komèrsio Boneiru i OGS (Bo Partner den Emprendemento i Éksito Finansiario) e muchanan a bini ku e siguiente dos problemanan, esta kayente di solo riba bich i sushedat na Boneiru. A base di esaki nan a inventá dos empresa, un empresa komersial i un empresa sosial. Un éksito adishonal di e proyekto akí ta ku na fin di e tarea for di e muchanan a bini 3 idea inovativo mas dilanti. Tokante e ideanan akí nan a interkambiá informashon.

Kámara di Komèrsio i OGS lo keda den kontakto ku e muchanan pa kontestá posibel preguntanan ku nan tin i pa ofresé guia na momentu di kuminsá ku nan negoshi.