Minister di Asuntunan Ekonómiko i Klima ta bishitá Kámara di Komèrsio Boneiru i empresarionan lokal

E minister di Asuntunan Ekonómiko i Klima, sra Heleen Herbert a hasi un bishita di trabou na Kámara di Komèrsio i Industria Boneiru (KdK Boneiru). E presidente i e direktor di KdK Boneiru a risibí e delegashon, huntu ku sr Hamza Kacha, hefe di unidat Hulanda Karibense di ministerio di Asuntunan Ekonómiko i Klima.

Durante e bishita, e presidente a duna un splikashon tokante e tareanan i trabounan di KdK Boneiru i tokante e ròl ku e organisashon ta desempeñá den dunamentu di sosten na e mundu empresarial lokal. Banda di esaki el a kompartí informashon tokante dos programa di empresariado ku ta keda ehekutá ku sosten di ministerio di Asuntunan Ekonómiko i Klima: Sentro pa Empresariado i The Next Step. Ámbos programa ta enfoká riba stimulashon di empresariado i fortifikashon di empresanan eksistente i empresanan ku ta kuminsando na Boneiru.

Seguidamente nan a bishitá dos empresario ku ta partisipá na e programanan akí.

White Island Healing (Sentro pa Empresariado)

White Island Healing ta un empresa unipersonal (eenmanszaak) ku ta enfoká riba dunamentu di sosten na fundashonnan chikitu, inisiativanan sosial i proyektonan di dunamentu di ayudo pa medio di servisio, coaching i guia práktiko. E empresa ta traha a base di un vishon holístiko, kaminda desaroyo personal, bienestar i konektividat komunitario ta sentral.

Banda di esaki White Island Healing ta desaroyá retraite-nan úniko ku un karakter outéntiko karibense. E retraite-nan akí ta kombiná relahamentu, kresementu personal, salú, eksperensia di naturalesa i kultura lokal. E partisipantenan ta haña oportunidat pa relahá, optené konosementu nobo i konektá nan mes ku e bunitesa natural, e hospitalidat i e rikesa spiritual di nos área karibense.

Bonchi Boneiru (The Next Step)

Bonchi Boneiru, ku Nort van Hulten a funda, ta un inisiativa lokal ku ta enfoká riba produkshon di kuminda i agrikultura sostenibel na Boneiru. E empresa ta kontribuí na fortifikashon di suministrashon lokal di kuminda pa medio di apliká métodonan sostenibel di kultivo i pa medio di ofresé produktonan lokal kualitativo.

Durante e bishita e delegashon por a tira un bista den e aktividatnan di Bonchi Boneiru i den e desafionan i oportunidatnan ku empresariado lokal dentro di e sektor agríkola ta trese kuné. Mas informashon tokante e produktonan i aktividatnan di Bonchi Boneiru ta optenibel via: https://www.bonchiboneiru.com/products

E bishita a brinda e minister i e representantenan di ministerio di Asuntunan Ekonómiko i Klima un oportunidat pa bai direktamente den kòmbersashon ku empresarionan i haña konosementu di e impakto di trayektonan di sosten na Boneiru. Esaki un biaha mas a suprayá importansia di kolaborashon entre gobièrnu, mundu empresarial i organisashonnan di sosten pa sigui fortifiká desaroyo ekonómiko di Hulanda Karibense.

Mas sinformashon tokante e dos programanan? Manda un email na  bis@kvkbonaire.com