Mishon komersial pa Miami ta brinda oportunidat nobo

Kralendijk, Boneiru – 8 di sèptèmber 2026 – Djamars siman pasá un presentashon a tuma lugá na Kámara di Komèrsio Boneiru tokante e mishon komersial ‘From Island Roots to Global Routes’ pa Miami. Pa un grupo di mas òf ménos binti empresario interesá, señora Tamara Leonard, presidente di e Hunta di Direktiva di St. Maarten Chamber of Commerce & Industry (COCI), a presentá e posibilidatnan ku e mishon ta ofresé pa empresarionan ku ke krese internashonalmente.

Direktor di Kámara di Komèrsio Boneiru, Phar Martha, a habri e enkuentro i a ekspresá su apresio pa e bon asistensia. Phar a gradisí St. Maarten Chamber of Commerce & Industry (COCI) pa organisá e mishon komersial akí pa Miami i el a enkurashá empresarionan pa inskribí nan mes i hasi uso di e oportunidat akí pa eksplorá merkadonan nobo.

Sra. Leonard a aksentuá ku e mishon ke prepará empresarionan na un manera práktiko pa hasi negoshi na Merka. Partisipantenan ta haña akseso na konosementu i guia relashoná ku entre otro habri un kuenta di banko merikano, registrá i lanta un empresa, imigrashon i visa komersial i strategianan pa ampliashon pa merkado merikano. Banda di esaki ponementu di kontaktonan komersial balioso i oumento di disposishon pa loke ta trata merkado i invershon ta sentral.

Konsientemente a skohe Miami komo porta di akseso stratégiko pa Merka i otro merkadonan internashonal. E siudat ta un sentro importante pa komèrsio, logístika, finansa, turismo i teknologia, i e ta ofresé akseso na invershonistanan, retnan komersial i dunadónan di servisio.

E programa ta enserá entre otro tayernan komersial, eventonan di ‘networking’, un Business Expo ku kontaktonan B2B i B2C i bishita na empresanan i organisashonnan ku ta aktivo den komèrsio, logístika i karga. Lo surgi oportunidat tambe pa topa ku suministradónan i partnernan komersial nobo i pa optené mas konosementu tokante importashon i eksportashon pa, for di òf via Miami. Mas aleu e mishon akí ta brinda empresarionan for di Boneiru oportunidat pa aktividat di ‘networking’ ku otro empresanan for di e islanan besiña Aruba, Kòrsou i Sint Maarten i hasi mas negoshi ku otro.

Durante e enkuentro a mustra tambe riba posibilidat di supsidio via Servisio di Reino pa Hulanda Empresarial (Rijksdienst voor Ondernemend Nederland – RVO), kaminda empresarionan, dependiente di e kondishonnan vigente, posibelmente ta bini na remarke pa un kompensashon di 50% di e gastunan di e mishon komersial. Aparte di esaki, Kámara di Komèrsio Boneiru lo organisá treinennan preparatorio pa prepará e partisipantenan mas mihó posibel pa e mishon.

Ku ‘From Island Roots To Global Routes’ nos ta invitá empresarionan pa establesé konekshonnan komersial nobo i pone pasonan konkreto den direkshon di kresementu internashonal. Nos ta enkurashá empresarionan ku ta interesá pa registrá na tempu.

Bo a pèrdè e presentashon? Por wak e presentashon kompleto bèk riba e kanal di YouTube di Kámara di Komèrsio Boneiru: Wak e presentashon riba YouTube.