Partisipantenan di Sentro pa Empresariado ta sigui treinen di Excel ku MCB Bank Bonaire a spònser

Dia 12 i 13 di aprel un deseo ku pa hopi tempu kaba e partisipantenan na e programa di Sentro pa Empresariado tabatin, a bira realidat: un treinen intensivo di Excel, ku MCB Bank Bonaire a spònser por kompleto. Señor Danny Gerharts, MBA, Corporate Banking Relationship Manager na MCB, a duna e treinen.

Kámara di Komèrsio i Industria Boneiru ta ekspresá su gran apresio i gratitut pa MCB Bank Bonaire su dedikashon i kontribushon generoso na e traspaso balioso di konosementu akí. Danki na nan sosten e partispantenan por a profundisá nan mes den aplikashonnan práktiko i avansá di Excel – un abilidat esensial pa kada empresario òf profeshonal.

Ku e treinen akí e partisipantenan por a fortifiká nan abilidatnan konsiderabelmente, loke ta aportá direktamente na nan kresementu profeshonal i nan efisiensia den práktika.

For di Ministerio di Asuntunan Ekonómiko i Servisio di Reino pa Hulanda Empresarial (Rijksdienst voor Ondernemend Nederland – RVO), Kámara di Komèrsio a haña enkargo pa desaroyá un programa pa empresariado ku ta duna sosten na empresarionan nobo ku desaroyo di nan empresa, pa di e manera ei realisá un empresa viabel. E programa akí mester sòru pa empresarionan ta mas mihó na altura di kua yudansa nan tin mester i kua ta e abilidatnan ku nan mester desaroyá pa nan por disponé di un empresa ku ta faktibel.

Mas informashon tokante e programa di Sentro pa Empresariado ku Kámara di Komèrsio ta ofresé, bo por haña riba wèpsait di Kámara di Komèrsio: www.bonairechamber.com. Bo por manda un email tambe na: ondernemerschap@kvkbonaire.com.