Sekretario di estado Eric van der Burg a bishitá Kámara di Komèrsio Boneiru i empresarionan lokal

Resientemente Kámara di Komèrsio Boneiru a risibí sekretario di estado Eric van der Burg pa un bishita di trabou kaminda empresariado i desaroyo ekonómiko na nos isla tabata sentral.

Durante e bishita, presidente di Kamara di Komèrsio Boneiru, señor Balentien, a duna un introdukshon kòrtiku tokante e tareanan i responsabilidatnan legal di Kámara di Komèrsio. Seguidamente tabatin presentashon di dos programa ku ta enfoká riba stimulashon i fortifikashon di empresariado na Boneiru: e programa di CVO (Centrum voor Ondernemerschap – Sentro pa Empresariado), i The Next Step. Ámbos inisiativa ta sostené empresarionan ku nan desaroyo profeshonal i komersial.

Seguidamente sekretario di estado Van der Burg a sera konosí ku dos empresario ku a kompletá un òf tur dos programa, i ku eksitosamente a apliká e konosementu atkerí den nan empresa.

E promé bishita na un empresa a tuma lugá na Total Safety First, un kompania ku ta enfoká riba entre otro siguridat (kontra kandela) i dunamentu di ayudo di emergensia i treinen di promé asistensia pa organisashonnan na Boneiru. Durante e bishita e sekretario di estado a haña konosementu di e ròl importante ku e empresa akí ta hunga den promoshon di siguridat i preparashon pa kualke eventualidat den e mundu empresarial lokal.

E di dos bishita a hiba e grupo na Flavorful Moment, un konsepto mobil inovativo di ‘sweets & drinks’. Nan a krea e empresa akí rònt di dos garoshi mobil: unu ta enfoká riba pasaboka dushi i e otro riba kos di bebe refreskante. Flavorful Moment ta mustra kon por kombiná kreatividat i empresariado na un manera eksitoso pa reakshoná riba deseonan di e merkado lokal.

Ku e bishita di trabou akí sekretario di estado Van der Burg a haña un bon bista di e sosten ku Kámara di Komèrsio Boneiru ta ofresé na empresarionan, i di e impakto positivo ku programanan di desaroyo por tin riba kresementu i profeshonalisashon di e mundu empresarial lokal.

Pa mas informashon tokante e dos programanan, bo por manda un email na bis@kvkbonaire.com