Sep 21
Notisia

Servisio adaptá di Kámara di Komèrsio Boneiru entrante 21 di sèptèmber 2020

Kámara di Komèrsio ta haña alkansabilidat i aksesibilidat importante. Pero salú di nos empleadonan i nos klientenan tambe ta di sumo importansia. Pa motibu di e medidanan ku nan a intensivá pa logra dominio di COVID-19 nos ta haña nos obligá pa entrante 21 di sèptèmber 2020 hasi algun adaptashon den e servisio ku nos ta duna.

Aki ta trata di adaptashon di nos orario i kambionan relashoná ku nos servisionan mas komun, manera petishon pa ekstrakto (uittreksel), inskripshon di empresa, mèldumentu di kambio i pagamentu di  kontribushon anual.  Aki bou bo por lesa mas tokante esaki.

Orario adaptá

Kámara di Komèrsio lo ta habrí for di djaluna te ku djabièrnè solamente entre 9.00 i 11.00 pa risibí kliente. Nos ta konsehá bo pa mas tantu posibel hasi uso di e posibilidatnan pa tuma kontakto ku nos pa medio di imeil, di manera ku bishita físiko ta keda limitá na e kasonan pa kua a traha sita adelantá. Pa traha un sita bo por manda un imeil na klantenservice@kvkbonaire.com. Alabes nos ta supliká bo pa mas tantu posibel paga ku karchi di bankomátiko òf ‘online’.

Medida di COVID-19

Kámara di Komèrsio ta pèrmití solamente 3 kliente den lòbi, mester desinfektá man i mester mantené un distansia di minimalmente 1,5 meter for di otronan. Tambe for di awor bistimentu di un tapaboka ta obligatorio.

Petishon pa ekstrakto (uittreksel)

Si bo ke pidi nos un ekstrakto (uittreksel), manda nos un imeil na klantenservice@kvkbonaire.com. Menshoná den bo imeil bon kla nòmber (komersial) kompleto di bo empresa i e number di KvK pa kua bo ke pidi un ekstrakto (uittreksel). Bo ta haña un konfirmashon di nos ku nos a risibí bo petsishon. Nos ta supliká bo pa paga via banko riba number di kuenta 102.822.07 di MCB òf 84000000.23.06.2712 di RBC. Si bo manda bo komprobante di pago bèk pa nos, nos ta prepará e ekstrakto (uittreksel) pa bo. Bo ta haña un mensahe tokante fecha i ora ku bo por pasa buska e ekstrakto (uittreksel).

Inskripshon di empresa

Nos ta supliká bo pa posponé inskripshon di empresa nobo un ratu si esei ta posibel. Si posponementu realmente no ta posibel i bo ke inskribí un empresa nobo, e ora ei por regla esei pa medio di imeil tambe. Manda nos un imeil ku e petishon pa inskripshon. Promé bo mes mester download e formulario korekto pa inskripshon for di nos wèpsait: https://bonairechamber.com/downloads/.  Seguidamente nos ta supliká bo pa manda e formulario yená huntu ku e dokumentonan relevante pa nos na:

klantenservice@kvkbonaire.com.  Despues ku nos risibí e formularionan aki nos ta tuma kontakto ku bo riba e number di telefon ku ta registrá na Kámara di Komèrsio pa verifiká e informashon. Despues di verifikashon nos ta prosesá e inskripshon dentro di 5 dia di trabou, si tur e informashonnan entregá ta kompleto.

Mèldu kambio

Si bo ke mèldu un kambio den bo inskripshon, bo por hasi esei pa medio di imeil tambe. Bo mes por download e formulario korekto pa hasi kambio for di nos wèpsait:    https://bonairechamber.com/downloads/.  Si bo no sa kua formulario bo mester pa bo akshon, e ora ei manda nos un imeil i naturalmente ku plaser nos lo yuda bo ku esei.  Nos ta supliká bo pa manda e formulario yená huntu ku e dokumentonan relevante pa nos na: klantenservice@kvkbonaire.com. Despues ku nos risibí e formularionan aki nos ta tuma kontakto ku bo riba e number ku ta registrá na Kámara di Komèrsio pa verifiká e kambionan. Si esei no logra nos lo verifiká e kambio na un otro manera. Despues di verifikashon nos ta prosesá e kambionan dentro di 5 dia di trabou, si tur e informashonnan entregá ta kompleto.

Pago di kontribushon anual

Nos ta supliká bo pa paga e kontribushon anual via banko riba number di kuenta 102.822.07 di MCB òf number di kuenta 84000000 23.06.271 di RBC i menshoná e number di faktura òf “KvK-nummer”. Nos ta supliká bo pa manda nos bo komprobante di pago via imeil na administratie@kvkbonaire.com.

Si dentro di 24 ora bo no haña un reakshon di nos riba bo imeil, sea asina bon di tuma kontakto telefóniko ku nos riba 717-5595, ekstenshon 5008. Gustosamente nos ta papia ku bo!

E adaptashonnan temporal aki den e servisionan ku nos ta duna ta bini na vigor entrante 21 di sèptèmber 2020 i ta dura tanten ku esaki ta nesesario.

Kontakto

Un biaha mas nos informashonnan di kontakto tras di otro pa bo: