Seshon di informashon aklarativo “Hasi negoshi digitalmente na un manera seif – di riesgo pa oportunidat” ta mustra empresarionan kon digitalisashon ta aselerá kresementu

Riba djárason 19 di novèmber NLX Caribbean a duna un seshon di informashon práktiko, aksesibel i aklarativo den kolaborashon ku Kámara di Komèrsio i Industria Boneiru (KdK Boneiru). Tema di e seshon di informashon tabata  “Hasi negoshi digitalmente na un manera seif – di riesgo pa oportunidat”. Hopi partisipante a rekonosé e ehèmpelnan for di nan práktika diario i nan a mira ku sierto adaptashonnan chikitu ya kaba por sòru pa mehorashonnan grandi.

E seshon a mustra ku hasi negoshi digitalmente na un manera seif no tin mester di ta un kambio kompliká òf kostoso. Ku e aserkamentu korekto for di mañan kaba empresarionan por pone vários paso den direkshon di un operashon empresarial resiliente pa futuro, efisiente i seif.

Durante e seshon di informashon a bira evidente ku diariamente hopi empresario ta kore riesgo sin ku nan sa esaki.

Pensa akí riba e siguiente puntonan:

• Dokumentunan ku ta pasa tur kaminda den email
• Failnan ku hende ta kompartí via diferente app sin siguridat
• Inklaridat tokante e último vershon di un dokumentu
• But òf daño di reputashon pa motibu di no a kumpli ku eksigensianan legal

Den e seshon a bira evidente kon e Document Management System (DMS) ta ofresé un solushon. Kon e ta funshoná? Un ‘businesscase’ paso pa paso a mustra esaki.

• Metadata: etiketa outomátiko ku hasi dokumentu fásil pa haña i fásil pa tene bista riba nan
• Workflows: pasonan fiho ku ta sòru ku semper tareanan ta kana na e mesun manera sin fout
• Shablon: dokumentunan strukturá adelantá ku ta laga bo spar tempu i evitá fout
• Kompartí na un manera seif: tur ora e mesun derechonan, nunka mas bo no ta manda algun insidentalmente robes
• Maneho di vershon: un solo dokumentu, un solo bèrdat

Ku satisfakshon Kámara di Komèrsio ta wak bèk riba e seshon di informashon akí i lo sigui komprometé su mes pa organisá seshonnan ku ta di balor agregá pa tur tipo di empresa i organisashon ku ta inskribí den Registro Komersial. Kámara di Komèrsio ta ekspresá su gratitut na e orador di NLX Caribbean, Frank de Pont, pa su entusiasmo i profeshonalidat ekselente.

Bo ke keda na altura di e tayernan, kursonan  òf proyektonan ku Kámara di Komèrsio i Industria Boneiru ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Bo por tuma kontakto tambe ku Kámara di Komèrsio na 717 – 5595 òf pa medio di manda un email na bis@kvkbonaire.com