Nov 27
Notisia

Seshon di informashon aklarativo tokante resiliensia sibernétiko den era di digitalisashon i inteligensia artifisial (AI) a hala hopi atenshon na Boneiru

Riba djárason 26 di novèmber Cybervade a duna un seshon di informashon práktiko, aksesibel i aklarativo den kolaborashon ku Kámara di Komèrsio i Industria Boneiru (KdK Boneiru). Tema di e seshon di informashon akí tabata ‘Resiliensia sibernétiko den era di digitalisashon i inteligensia artifisial (AI)’. Ku hopi atenshon i visibelmente entusiasmá e personanan presente a skucha kon i riba kiko nan tin ku paga tinu den nan empresa.

Hasiendo uso di un modelo klarito di kuater koló, Cybervade a hiba e partisipantenan atraves di e espektro kompleto di siguridat sibernétiko i resiliensia sibernétiko, kaminda nan a trata e siguiente 6 puntonan:

  • E konteksto di digitalisashon i inteligensia artifisial (AI): kon nos komunidat ta kambiando i kua ta e impakto ku esaki tin
  • Siguridat sibernétiko 101: e prinsipionan básiko ku tur hende mester sa
  • E parti kriminal di sibernétika: komprendé e sistemanan di traha di ‘hacker-nan’ i importansia di antisipá riba nan métodonan
  • Medidanan ofensivo: strategianan proaktivo pa tèst i fortifiká e diferente sistemanan
  • Medidanan defensivo: medidanan práktiko i direktamente aplikabel di protekshon
  • Aserkamentu organisatorio: e ròl krusial di liderazgo i maneho – ‘the tone at the top’ (aktitut di gerensia) na momentu di krea un kultura sibernétikamente seif den bo empresa

Kámara di Komèrsio ta wak bèk ku satisfakshon riba e seshon di informashon akí i lo sigui komprometé su mes pa organisá seshonnan ku ta di balor agregá pa tur tipo di empresa i organisashon ku ta inskribí den Registro Komersial. KdK ta ekspresá su gratitut pa e oradornan di Cybervade, Caetano Kluyver i Niko Kluyver, pa nan entusiasmo i profeshonalidat ekselente.

Bo ke keda na altura di e tayernan, kursonan òf proyektonan ku Kámara di Komersio i Industria ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Via e siguiente lenk bo por registrá tambe pa e boletin notisiero programa sibernétiko pa henter gobièrnu – Nieuwsbrief Overheidsbrede Cyberprogramma: https://www.weerbaredigitaleoverheid.nl/newsletter/460f2b82/

Bo por tuma kontakto tambe ku Kámara di Komèrsio na 717 – 5595 òf manda un email na bis@kvkbonaire.com