Seshon di informashon balioso ‘Insights by RVO’, tokante supsidio i instrumentonan

Bonaire, 3 di aprel 2025 – Riba djaweps 3 di aprel 2025 Kámara di Komèrsio Boneiru, den kolaborashon ku e Servisio di Reino pa Hulanda Empresarial (Rijksdienst voor Ondernemend Nederland – RvO) a organisá un seshon di informashon pa empresarionan na Boneiru. E seshon na ingles, titulá ‘Insights by RVO’, a ofresé e empresarionan konosementu balioso di e supsidionan i instrumentunan ku ta disponibel pa aktividatnan di eksportashon pafó di Reino Hulandes.

Durante e seshon sra. Soelan Daal, konsehero di emprendementu internashonal na RvO, a duna un splikashon detayá tokante e diferente posibilidatnan di supsidio i e kondishonnan pa hasi petishon pa e supsidionan akí. E empresarionan a haña konosementu tambe di e proseso di hasi petishon i kon nan por bini den kontakto ku un konsehero pa guia mas aleu.

Un parti importante di e seshon tabata e presentashon di Alvin Obersi, un empresario lokal ku a kompartí su eksperensianan ku eksportashon. Obersi a papia tokante su propio trayekto di eksportashon i a duna e empresarionan ku tabata presente vários tep i konseho práktiko.

E enkuentro a atraé mas òf ménos 20 empresario, di kua hopi ta aktivo kaba den eksportashon òf ku tin intenshon pa hasi esaki den futuro. E empresarionan a indiká ku prinsipalmente tin nesesidat pa supsidio pa gastu di transporte. Esaki ta konsekuensia di e desafionan logístiko ku empresarionan na Boneiru ta eksperensiá, loke ta hisa gastu di transporte i ta stroba nan den nan búskeda pa merkadonan nobo. For di den sala a bini un proposishon pa bini ku un plataforma òf pa organisá enkuentro den un forma regular.

E enviado spesial, sr Edison Rijna, ku tambe tabata presente na e seshon, a indiká ku resientemente a publiká un rapòrt tokante e desafionan logístiko entre Colombia i Boneiru.

Phar Martha, direktor di Kámara di Komèrsio Boneiru, tabata di akuerdo ku e idea di e empresarionan ku pa medio di organisá enkuentro òf lanta un plataforma, por yega na interkambio di idea ku otro. For di esaki por surgi proposishonnan konkreto ku por kondusí na solushon pa e opstákulonan logístiko.

Kámara di Komèrsio Boneiru ta aksentuá su kompromiso pa, huntu ku su partnernan, sostené i informá empresarionan na Boneiru tokante e posibilidatnan di eksportashon i tambe tokante e opstákulonan logístiko ku ta forma un estorbo pa nan na momentu di drenta den merkadonan nobo.

Bo ke keda na altura di e tayernan, kursonan òf proyektonan ku Kámara di Komèrsio i Industria Boneiru ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Bo por tuma kontakto tambe ku Kámara di Komèrsio via 717–5595 òf manda un email na bis@kvkbonaire.com.