Seshon di informashon ‘Stop Being Your Business, Start Building One’ ta stimulá kresementu serka empresarionan

Resientemente Kámara di Komèrsio Boneiru, dentro di e programa di Sentro pa Empresariado – The Next Step, a organisá e seshon di informashon ‘Stop Being Your Business, Start Building One’. E entrenadó Ottmar Martie, alabes entrenadó di nos KvK Academy, a duna guia na un grupo di mas òf ménos 25 empresario durante un enkuentro inspirativo i interaktivo, kaminda importansia di prosesonan empresarial tabata sentral.

E seshon a surgi for di kòmbersashonnan ku empresarionan dentro di The Next Step – E Siguiente Paso, na unda klaramente a bini dilanti ku hopi empresario ta eksperensiá problema pa laga nan empresa krese, pa motibu ku ainda nan ta keda muchu pegá den nan trabounan operashonal diario. Esaki tin komo konsekuensia ku empresarionan no tin espasio pa asuntunan manera kresementu stratégiko. Señor Martie a splika kon prosesonan bon hinká den otro por aportá na efisiensia, struktura i eskalabilidat.

Durante e seshon ku a dura tres ora, a trata entre otro tópikonan manera ehekushon di un ouditoria interno i deskripshon di prosesonan empresarial. E interakshon aktivo ku e partisipantenan, e hopi preguntanan for di e públiko i e echo ku na final tur hende a keda sinta ku gana di haña mas informashon, ta suprayá importansia i relevansia di e tema akí pa empresarionan na Boneiru.

Jían Magdalena, konsehero empresarial na Kámara di Komèrsio, a anunsiá ku nan ta bai organisá un seshon di kontinuashon pa profundisá mas den sierto partinan spesífiko di e tópiko. Banda di esaki el a invitá empresarionan (semi) avansá pa tuma kontakto ku Kámara di Komèrsio Boneiru ora nan ta interesá den guia relashoná ku kresementu di nan empresa pa medio di e programa The Next Step – E Siguiente Paso.

The Next Step – E Siguiente Paso ta forma parti di e Sentro pa Empresariado i e ta keda supsidiá pa Ministerio di Asuntunan Ekonómiko (EZ) i Servisio di Reino pa Hulanda Empresarial (Rijksdienst voor Ondernemend Nederland – RVO).

Kámara di Komèrsio Boneiru ta ekspresá su apresio pa Ottmar Martie pa su kontribushon balioso i su presentashon pashoná.

Pa mas informashon tokante e programa The Next Step – E Siguiente Paso, òf pa registrá pa haña guia, por fabor manda un email na bis@kvkbonaire.com òf pasa personalmente na nos ofisina na Kaya Amsterdam 23.