Seshon eksitoso di ‘speeddate’ entre dunadónan di trabou i profeshonalnan hóben na Boneiru

Riba 14 di febrüari 2025 Kámara di Komèrsio Boneiru den kolaborashon ku WeConnect i Team a organisá un eksitoso seshon interaktivo, kaminda dunadónan di trabou i profeshonalnan hóben a bai den kòmbersashon ku otro tokante e proseso di reklutashon. Den forma di ‘speeddate’ nan a papia tokante temanan manera remigrashon, kultura laboral, oportunidat pa karera i reklutashon & oferta.

Ocho empresa for di diferente sektor ku tin eksperensia ku reklutashon di profeshonalnan hóben a partisipá na e seshon. Seis profeshonal hóben a haña oportunidat pa kompartí nan eksperensianan i bai direktamente den kòmbersashon ku dunadónan di trabou. E interkambio a sòru pa konosementu balioso serka ámbos partido.

For di e kòmbersashonnan algun konklushon importante a bini dilanti: * Tin nesesidat pa un solo sitio sentral kaminda profeshonalnan hóben por haña vakatura, manera un banko di vakatura online. * Dunadónan di trabou por ta mas transparente tokante posibilidatnan pa sigui krese i ta enkurashá nan pa anda den un forma mas kreativo ku nan kantidat di personal i e nesesidat pa mas personal, pa krea trayektonan nobo di kresementu. * Mihó komunikashon entre dunadónan di trabou i potensial kandidatonan ta esensial pa atraé i mantené talento.

Kámara di Komèrsio Boneiru ta gradisí Tanja Fraai di WeConnect, Judith Brekelmans di Team, e dunadónan di trabou ku a partisipá i e profeshonalnan hóben pa nan dedikashon i enbolbimentu durante e seshon akí. E inisiativa akí ta kontribuí na un konekshon mas fuerte entre dunadónan di trabou i talento na Boneiru, loke ta yuda pa mehorá e merkado laboral lokal, i ta konektá ku e meta di Kámara di Komèrsio Boneiru pa duna sosten na empresarionan den tur aspekto di nan maneho empresarial, entre otro reklutashon i selekshon.