Seshon informativo tokante finansiamentu di Union Oropeo pa siguridat sibernétiko

Resientemente a tuma lugá un seshon informativo tokante e posibilidatnan di finansiamentu i supsidio pa proyektonan di siguridat sibernétiko, ku enfoke riba organisashonnan den e partinan karibense di Reino. Durante e seshon e Sentro di Koordinashon Hulandes pa Siguridat Sibernétiko (Nederlands Cybersecurity Coördinatiecentrum – NCC-NL) a duna un presentashon kla i práktiko tokante e posibilidatnan di finansiamentu dentro di programanan oropeo, entre otro Digital Europe i Horizon Europe.

Nan a duna splikashon amplio tokante e pasonan ku organisashonnan mester sigui pa bini na remarke pa supsidio oropeo. Den esaki nan a dediká atenshon na kon pa haña areglonan adekuá di supsidio, evaluashon di e kondishonnan, preparashon di e proposishon di proyekto i entrega di un petishon pa supsidio.

Na un manera komprendibel e presentashon a klarifiká na unda por haña informashon relevante, kon organisashonnan por apliká e informashon akí, i kua ta e proseduranan ku nan mester sigui pa efektivamente hasi petishon pa finansiamentu.

Nan a splika tambe kua ta e sosten ku NCC-NL por ofresé na momentu di eksplorashon di e posibilidatnan di finansiamentu i preparashon di e petishon.

E partisipantenan a haña konosementu balioso i diferente hèrmènt konkreto pa investigá e posibilidatnan di finansiamentu oropeo pa nan propio proyektonan di siguridat sibernétiko mas aleu.

Mas informashon tokante finansiamentu di Union Oropeo pa siguridat sibernétiko:

https://english.rvo.nl/topics/ncc-nl/ncc-nl-european-funding-cybersecurity/how-to-apply

Ku e enkuentro akí un biaha mas Kámara di Komèrsio Boneiru ta suprayá importansia di kompartimentu di konosementu i fortifikashon di empresariado na Boneiru. Pa medio di proveé empresarionan ku konosementu aktual i instrumentonan práktiko, Kámara di Komèrsio ke kontribuí na desaroyo empresarial sostenibel i un ekonomia lokal fuerte.

Kámara di Komèrsio ta ekspresá su gratitut na e orador di NCC-NL, Nina Huijberts, pa su ekspertisio, su entusiasmo i e abilidat pa na un manera aksesibel transmití problemátikanan kompleho.

Bo ke keda na altura di e tayernan, kursonan òf proyektonan ku Kámara di Komèrsio i Industria Boneiru ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.

Bo por tuma kontakto ku Kámara di Komèrsio via 717 – 5595 òf bo por manda un email na bis@kvkbonaire.com