Tayer inspirativo di Sentro pa Empresariado: un base fuerte pa bo atministrashon di empresa

Sentro pa Empresariado a organisá un tayer inspirativo ku komo tema ‘Bo atministrashon di empresa’. Partisipantenan di Sentro pa Empresariado bon motivá a partisipá na e seshon práktiko i edukativo akí, ku a enfoká riba kon pa hinka un atministrashon sólido den otro pa tantu un empresa unipersonal (eenmanszaak – EZ) komo pa un sosiedat ku responsabilidat limitá (besloten vennootschap – BV). Tur partisipante tabata empresarionan ku ta kuminsando ku nan negoshi.

Bou di guia di Damarys Sint Jago e partisipantenan a deskubrí dikon un bon atministrashon ta esensial pa kresementu, bista general i siguridat finansiero. For di pèrkurá pa un bon bista di tur entrada i gastu te evitá e fayonan ku empresarionan ta hasi hopi biaha: tur kos a keda sostené ku métodonan interaktivo di siñamentu. E tayer a brinda konosementu ku ta direktamente aplikabel i ku empresarionan por kuminsá traha kuné mesora.

Ku e tipo di tayernan akí Sentro pa Empresariado ta sigui sostené empresarionan ku ta kuminsando i empresarionan aspirante den nan kresementu, konosementu i profeshonalisashon. Esaki pa motibu ku un bon atministrashon por sierto ta loke ta forma e base di un empresa eksitoso.

Bo tambe ke haña mas grep riba bo sifranan i hasi negoshi ku konfiansa? Tene nos agènda na bista i registrá pa e tayernan ku ta na kaminda – pasobra un empresa eksitoso ta kuminsá ku e konosementu korekto. Sentro pa Empresariado ta sigui invertí den kapasitashon práktiko ku ta hasi empresarionan mas fuerte.

For di Ministerio di Asuntunan Ekonómiko i Servisio di Reino pa Hulanda Empresarial (Rijksdienst voor Ondernemend Nederland – RVO), Kámara di Komèrsio a haña enkargo pa desaroyá un programa di empresariado ku ta sostené empresarionan nobo ku desaroyo di nan empresa, ku komo meta pa realisá un empresa viabel.

Bo ke mas informashon tokante pasonan spesífiko òf bo tin pregunta tokante lantamentu di bo empresa? E ora ei tuma kontakto via ondernemerschap@kvkbonaire.com òf yama 717 5595. Bo por pasa personalmente tambe na Kaya Amsterdam 23. Nos ta habrí nònstòp for di 08’or te 15’or.