Un biaha mas a finalisá un edishon eksitoso di KvK Academy.

Riba djamars 14 di novèmber último tabatin entrega di sertifikado na 27 partisipante ku a partisipá na KvK Academy 2023.

Ku e trayekto di KvK Academy, Kámara di Komèrsio ta spera di yuda e partisipantenan oumentá nan chèns pa logra éksito komo empresario pa medio di añadí mas abilidat empresarial na nan kapasidatnan. Di e forma akí Kámara di Komèrsio ke fortifiká ekonomia di Boneiru, ofresiendo empresarionan un chèns mas grandi pa logra éksito.

Komo tarea final, e aña akí tambe a tene un ‘Shark Tank’, o sea un Tanki di Tribon, kaminda e partisipantenan mester a presentá nan empresa na un manera kreativo dilanti di 5 miembro di hurado. Durante un presentashon di 5 minüt nan a hasi tur loke tabata na nan alkanse pa konvensé e miembronan eksperto di hurado di e idea di nan empresa i e konosementu i abilidat empresarial ku nan a atkerí.

Señora Tiffany Dorand a presentá su ‘MAHALO’ i a keda proklamá komo ganadó. E ta bai introdusí un delisioso ‘bowl’ for di Hawaii na nos isla Boneiru. E ganadó a bai kas ku vários bunita premio ku spònsernan a pone disponibel.

Entidat Públiko Boneiru a pone un suma di $ 10.000,- disponibel. Maduro & Curiel’s Bank tambe a pone un suma di $ 1000,- disponibel pa e ‘first runner-up’, e di dos premio pues. Cactus Accounting a opsekiá un suma di $ 1000,- pa e ‘second runner-up, esta e di tres premio. Banda di esaki Cactus Accounting Services a ofresé un trayekto di guia. E Sentro di Salú Bon Bida a regalá e ganadó un aña di ‘fitness’, na balor di $ 750,-. Telbo Bonaire a opsekiá e ganadó un aña di internèt komersial grátis. Toursim Corporation Bonaire TCB ta duna un seminar pa haña konosementu den e region.

Serka City Shop e ganadó a haña un lèptòp i Obersi Group a dun’é un printer. Rocargo Services a pone un suma di $ 500,- disponibel pa transportá e merkansianan ku e ganadó kumpra pa Boneiru. Rijksdienst voor Ondernemerschap, un departamento di ministerio di Asuntunan Ekonómiko i Klima (EZK), a ofresé e ganadó un trayekto di coaching di 24 ora. Tambe e ganadó por bai buska su reibeweis grandi ku e premio di Nynedroid Autorijschool. Finalmente Succesfully IT ta opsekiá un aña di Microsoft 365 Business grátis.

Intenshon di e premionan akí ta pa duna sra Tiffany Dorand “MAHALO”, ganadó di e promé premio, sra Mirte Kuijt “Online veterinaire dienstverlening” (di dos premio) i sr Zahid Frans “Krioyo” (di tres premio) un sosten èkstra pa profeshonalisá nan empresa mas aleu.

Kámara di Komèrsio Boneiru ta gradisí e spònsernan menshoná akí riba i tambe e treinernan interno i eksterno pa nan aporte na KvK Academy i ta felisitá e ganadónan i e otro partisipantenan ku e resultado ku nan a logra.

Kámara di Komèrsio Boneiru ta deseá tur partisipante hopi éksito ku nan empresa. For di aña 2018 Kámara di Komèrsio Boneiru anualmente ta organisá KvK Academy. Ministerio di Asuntunan Ekonómiko ta supsidiá e kuríkulo di KvK Academy. Intenshon di Kámara di Komèrsio ta pa ofresé e kuríkulo akí den aña 2024 tambe.

https://www.facebook.com/BonaireCoCnI/videos/1065058031187293