Un bista bèk i un bista padilanti huntu ku partisipantenan i stakeholdernan relashoná ku e mishon komersial pa Colombia

Djabièrnè 20 di sèptèmber 2024 – Kámara di Komèrsio i Industria Boneiru (KvK Boneiru) huntu ku Gabinete di Enviado Spesial, Holland House Colombia, Grand Thornton i un gran parti di e 30 partisipantenan di e islanan BES tabata personalmente òf virtualmente presente na un evento kaminda a tira un bista bèk i un bista padilanti relashoná ku e mishon komersial pa Colombia den luna di yüni 2024.

Ku hopi plaser nos por informá ku bou di e partisipantenan tin un kantidat grandi ku ya kaba a hasi vários paso pa hasi negoshi i kompartí konosementu ku empresarionan na Colombia. Relashoná ku e mishon komersial ya kaba nan ta importá diferente produkto i tambe nan ta kompartí konosementu ku empresanan na Colombia pa loke ta trata konstrukshon en general i konstrukshon di bibienda en partikular.

Despues di e mishon tin algun partisipante ku a bai Colombia vários biaha pa sera akuerdo òf pa sigui negoshá. Dos di e partisipantenan akí a tene un presentashon pa e grupo tokante kiko nan a alkansá te ku awor. Un di nan asta a bisa ku el a lanta un filial na Colombia, for di kua e ta hasi negoshi riba merkado kolombiano.

Durante e seshon a anunsiá ku ta bini un investigashon ku ta enfoká riba e desafionan logístiko for di Colombia pa islanan BES i kua ta e pasonan ku mester tuma pa atendé ku e desafionan logístiko akí.

Huntu ku Gabinete di Enviado Spesial e organisashonnan ta preparando un mishon komersial pa Panama. Dia 26 di sèptèmber ta tene un webinar online tokante esaki.

Kámara di Komèrsio Boneiru ta gradisí tur partisipante na e seshon i e momentu ku un bríndis pa klousurá esaki i ta spera kontinuashon di e kolaborashon.