Un tayer eksitoso CBS Hulanda Karibense ‘For di data pa konosementu: Kon bo ta usa data i na unda bo ta haña esaki?’
Riba djamars 25 i djárason 26 di mart 2025, Ofisina Sentral di Estadístika Hulanda Karibense (CBS) a tene un tayer eksitoso den kolaborashon ku Kámara di Komèrsio i Industria Boneiru (KdK Boneiru). E tema di e tayer interaktivo tabata ‘For di data pa konosementu: Kon bo ta usa data i na unda bo ta haña esaki?’ E partisipantenan tabata sumamente entusiasmá tokante e konosementu balioso i e tepnan i hèrmèntnan práktiko ku nan a optené.
Durante e tayer e partisipantenan a siña tokante importansia di data i kon pa implementá esakinan den nan organisashon, di manera ku nan por basa maneho mas mihó ainda riba echo enbes di riba opinion. E tópikonan ku a keda tratá tabata:
- Introdukshon di Ofisina Sentral di Estadístika i un bista den e sifranan ku nan tin disponibel
- Kolektá data i kombiná esakinan
- Optené konosementu i kon pa apliká esaki
- Kon pa inkluí data den maneho
- Kon pa usa data pa maneho di evaluashon
- Na unda i tokante di kiko por haña data di Ofisina Sentral di Estadístika Hulanda Karibense Statline
- Kon pa usa Statline i kiko ta posibel ku esaki
Ku satisfakshon Kámara di Komèrsio ta wak bèk riba e tayer i lo sigui hasi esfuerso pa organisá seshonnan ku ta di balor agregá pa tur tipo di empresa i organisashonnan ku ta inskribí den Registro Komersial. Kámara di Komèrsio ta ekspresá su gratitut pa e oradornan di Ofisina Sentral di Estadístika Hulanda Karibense, Arjan van der Meer i Esther Meijer-Sedney, pa nan entusiasmo i profeshonalidat ekselente.
Ofisina Sentral di Estadístika ta e kolektadó di data i trahadó di estadístika pa Hulanda Karibense i nan ta traha estadístika tokante diferente tema, manera poblashon, ekonomia i bienestar. Ofisina Sentral di Estadístika a kuminsá un kampaña pa públiko pa oumentá konsientisashon riba tereno di data den Hulanda Karibense. Si bo ta deseá mas informashon, e ora ei bishitá e wèpsait òf manda un email na caribischnederland@cbs.nl.
Aboná tambe nos boletinnan di notisia tokante Hulanda Karibense i sigui nos riba Facebook i Instagram @Statisticscaribbeannetherlands.
Bo ke keda na altura di e tayernan, kursonan òf proyektonan ku Kámara di Komèrsio i Industria Boneiru ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista.
Bo por tuma kontakto tambe ku Kámara di Komèrsio via 717–5595 òf manda un email na bis@kvkbonaire.com.
