Bonaire Algaeparc ta drenta su siguente fase

Riba djaweps 15 di mart 2018 un delegashon di Universidat di Wageningen bou di guia di prof. dr. Rene Wijffels a presentá resultado di e investigashon di faktibilidat pa loke ta trata produkshon di mikro-alga riba eskala komersial. E resultadonan di e investigashon ta hopi prometedor. Boneiru tin un klima ideal pa produkshon di mikro-alga pa motibu di e temperatura i e kantidat di solo.

Ku finalisashon di e investigashon di faktibilidat e siguiente fase di e proyekto a kuminsá. Den e fase aki lo realisá un instalashon piloto pa investigá kua ta e sirkumstansianan mas ideal pa produkshon di alga na Boneiru. Pa e instalashon piloto Kompania di Awa i Elektrisidat Boneiru (WEB) ta pone un espasio di laboratorio i un parti di e tereno na Barkadera (e anterior tereno di Radio Nederland Wereldomroep) disponibel. Dos studiante PhD (studiante di doktorado) di Universidat di Wageningen ta bai hasi e investigashon. Pa produkshon di alga ta hasi uso di un alga ku ta presente den laman rondó di nos isla. Den e simannan binidero un di e studiantenan lo saka vários muestra for di laman na diferente sitio rondó di nos isla pa for di e muestranan aki  isolá e alga ku ta mas adekuá. E studiantenan PhD lo hasi nan investigashon parsialmente na Wageningen i parsialmente na Boneiru. Ta vèrwagt ku e investigashon ta bai dura 2 aña.

E proyekto aki, ku ta un kolaborashon entre Universidat di Wageningen, organisashon di biahe TUI, Entidat Públiko Boneiru, ministerio di Asuntunan Ekonómiko i Kompania di Awa i Elektrisidat Boneiru (WEB), a risibí supsidio di Union Oropeo (OCTA). Union Oropeo, meskos ku Entidat Públiko Boneiru, ke stimulá inovashon i diversifikashon di ekonomia.

Artikulo originaal Openbaar Lichaam Bonaire