Boneiru: the first Blue Destination of the world!

Awe riba dia di selebrashon di Dia Mundial di Oséano nan a anunsiá un primisia na Boneiru: for di 8 di yüni 2018 nos isla ta ofisialmente konosí komo ‘the first Blue Destination of the world – e promé Destinashon Blou na mundu’. Ya pa desénas di aña kaba nos isla ta biba konforme e prinsipionan tras di e konsepto aki i awe mundu ta siña konosé Boneiru bou di e nòmber ei.

Dikon Blue Destination – Destinashon Blou?

Boneiru ta inseparabelmente konektá ku su naturalesa, ku e laman ku ta rondon’é, ku e aire limpi i e bientu refreskante. For di prinsipio kaba su habitantenan ta hasi uso di e elementonan aki, pa traha den, pa kome for di dje, pa move riba dje of pa distraí. Naturalesa ta importante pa nos isla, esei bo ta mira ora ku bo wak e superfisie total ku e áreanan ku ta destiná pa naturalesa tin. Kasi 40 aña pasá a tuma e desishon pa hasi e laman rònt di Boneiru un àrea di naturalesa protehá. For di e tempu ei a bini hopi mas inisiativa ku nos por ta orguyoso di dje, por ehèmpel riba tereno di sostenibilidat. Na e momentunan aki ya kaba ta generá 40% di e energia ku ta suministrá Boneiru kuné, di forma sostenibel. Ku esei nos tin un bunita kombinashon di ‘bèrdè’ di sostenibilidat i blou di nos laman i shelu. Hasi un buelo riba nos isla i bo ta mira mesora dikon nos ta duna Boneiru e título di Blue Destination – Destinashon Blou: e diferente kolónan blou di nos laman ta kontrastá skèrpi ku e blou di nos shelu briante. Atmirá laman di Lac, e kolónan di e diferente saliñanan i Klein Bonaire.

I tòg sobrá di mundu sa masha tiki òf kasi nada di Boneiru. Nos ta konosí riba tereno di sambuyamentu, pero pa hopi otro hende, empresa i invershonista no ta konosí kiko tur e kosnan ta ku nos tin di ofresé. Pa sòru pa nos atraé bishitante, empresario i institutonan di investigashon, ku tur tin un balor agregá pa nos isla i su habitantenan, bo mester tin un propio identidat ku ta dirigí riba eksterior. E fórmula di Blue Destination – Destinashon Blou lo yuda den esaki, dor di duna nifikashon konkreto na loke nos isla ta i ke radia.

Ku solamente konektá e konsepto ‘Blue Destination – Destinashon Blou’ nos no ta kla ainda komo Boneiru, tin mas kos ku tin ku tuma lugá. Lo entrevistá nos habitantenan pa haña un bista kon nan ta mira nan isla i su ‘Destinashon Blou’. Lo organisá hopi aktividat ku lo tin vínkulo ku e tema di Blue Destination – Destinashon Blou, por ehèmpel Sharkweek (Siman di Tribon) i Ocean Cleanup (limpiesa di laman) dia 9 di yüni. Komo aktividat prinsipal dia 10 di òktober 2018 lo organisá un evento grandi pa tur habitante. E evento aki, na kuminsamentu di Regata 2018, lo ta inisio di tur sorto di evento, na nos skolnan i na enkargo di vários empresa riba nos isla.

E konsepto aki na un manera sostenibel ta trese naturalesa, kultura i desaroyo ekonómiko serka otro. I esaki lo bai ofresé pueblo di Boneiru bentaha riba diferente nivel. Mas ámplio e sosten lo ta, mas grandi e impakto ku e tin riba tur hende lo ta.