Kolaborashon eksitoso entre Kámara di Komèrsio Boneiru i HBN Law & Tax

For di 21 te ku 24 di mei Kámara di Komèrsio i Industria Boneiru den kolaborashon ku HBN Law & Tax a organisá vários seshon di informashon ku komo tema e diferente imposishonnan di impuesto riba ganashi i entrada di Empresa Unipersonal (EZ), Sosiedat Limitá (BV) i Kompania Anónimo (NV) i tokante e impuestonan indirekto pa empresarionan i kompanianan (impuesto riba sueldo/loonbelasting i ABB).  

Ku hopi interes e empresarionan ku a partisipá a sigui e seis seshonnan ku tabata kompletamente yen. Den e seshonnan di informashon ku tabata na enkargo di HBN Law & Tax, e partisipantenan a optené vários instrumento i konosementu tokante e diferente leinan i reglanan di impuesto, relashoná ku imposishon di impuesto riba ganashi i entrada, i tokante impuesto riba sueldo (loonbelasting) i impuesto riba gastu general (algemene bestedingsbelasting – ABB) pa empresarionan i kompanianan. E instrumentonan akí nan por usa i prosesá den nan propio organisashonnan.  

E partisipashon entusiasmá di e partisipantenan i e apresio pa e orador ta un indikashon ku sigur ta bale la pena pa ripití e tipo di seshonnan di informashon akí.  

Ku satisfakshon Kámara di Komèrsio ta wak bèk riba e enkuentronan akí i lo sigui hasi esfuerso pa organisá seshon ku ta di balor agregá pa tur tipo di empresa i organisashon ku ta inskribí den Registro Komersial. Tambe Kámara di Komèrsio ta ekspresá su gratitut pa e orador di HBN Law & Tax, Jorik Julsing, pa e entusiasmo i e ekselente profeshonalidat ku el a mustra.  

Jorik Julsing di HBN Law & Tax a indiká ku e ta hopi kontentu ku e kantidat grandi di partisipante, e interes pa e tópiko i partisipashon di e partisipantenan na tur seshon i sigur no na último lugá e kolaborashon sumamente plasentero ku Kámara di Komèrsio i Industria Boneiru. 

Bo ke keda na altura di e tayernan, kursonan of proyektonan ku Kámara di Komèrsio i Industria Boneiru ta bai ofresé e aña akí? E ora ei nos ta invitá bo pa tene nos wèpsait i nos página di Facebook na bista. 

Bo por tuma kontakto tambe ku Kámara di Komèrsio via e number di telefòn 717 5595 òf bo por manda un email na bis@kvkbonaire.com.