Ainda por inskribí pa e seshonnan di informashon tokante oumento di sueldo mínimo riba djaweps 13 di yüni 2024

Riba djaluna 11 di yüni 2024 e promé seshonnan di informashon tokante oumento di e Sueldo Mínimo Legal a tuma lugá. Mas òf ménos 30 empresario a asistí na e seshonnan parti mainta i parti atardi na papiamentu, spañó, hulandes i ingles. Ainda ta posibel pa inskribí pa e seshonnan riba djaweps 13 di yüni.

E kolaborashon entre Kámara di Komèrsio i Entidat Públiko Boneiru a keda fortifiká pa presensia di e unidat di Asuntunan Sosial i Empleo di RCN, ku durante e seshonnan di informashon a duna informashon tokante e oumento di sueldo mínimo, e kompensashon pa dunadónan di trabou i tokante tur asuntu laboral ku tin di haber ku esakinan. Durante e seshonnan Kámara di Komèrsio, banda di informashon tokante e ‘Helpdesk Sueldo Mínimo Legal’, a papia ampliamente tambe tokante e instrumento di kalkulashon. Empresarionan por usa esaki pa haña mas konosementu tokante kiko e efektonan di e oumento di sueldo mínimo legal ta riba nan gastunan di salario i riba nan empresa den su totalidat.

Despues di e presentashonnan tabatin oportunidat pa e empresarionan hasi pregunta na Kámara di Komèrsio, e unidat di Asuntunan Sosial i Empleo di RCN i na Entidat Públiko Boneiru. Riba djaweps 13 di yüni lo tin dos seshon mas, parti mainta di 10:00 or pa 11:00 or un seshon na hulandes i ingles i parti atardi di 18:00 or pa 19:00 or un seshon na papiamentu i spañó.

Si bo ke asistí na un di e seshonnan akí, esei ta posibel pa medio di inskribí bo mes via e lenk akí: https://forms.gle/XpUnPMPqna4r44xF8