Kámara di Komersio Boneiru a organisá diferente tayer interaktivo tokante empresariado pa studiantenan di MBO

Kámara di Komèrsio i Industria Boneiru, den kolaborashon ku MBO Boneiru, a organisá tres tayer interaktivo pa diferente grupo di studiante den kuadro di e marshe anual di MBO. Durante e marshe akí e studiantenan ta haña oportunidat pa durante un solo dia hinka nan propio empresa den otro i manehá esaki riba plenchi di skol.

E konsehero empresarial Jían Magdalena dia 13 di aprel tabata enkargá ku un tayer pa e grupo di ‘IT & Business Services’ (37 studiante) i un tayer pa e grupo di Dunamentu di Servisio (44 studiante). Dia 7 di mei a sigui un tayer pa e grupo di Deporte i Trahadó Pedagógiko (31 studiante).

Durante e tayernan a duna splikashon tokante e ròl di Kámara di Komèrsio i Industria Boneiru den nos ekonomia lokal, su tareanan, su proyektonan i e sosten ku e ta brinda na empresarionan na nos isla. Banda di esaki e konsehero empresarial a papia tokante importansia di empresariado i tokante kon studiantenan por rekonosé problemanan den komunidat i solushoná esakinan ku un idea pa un negoshi.

Tambe a bini tópikonan dilanti manera importansia di un logo fuerte i un lema ku ta hala atenshon, trahamentu di aviso i un introdukshon di e ‘Business Model Canvas’, un kuadro visual ku na un manera komprendibel ta resumí e nuebe komponentenan esensial di un modelo di negoshi.

E studiantenan tabata entusiasmá i nan a partisipá aktivamente na e tayernan. Tabatin hopi interakshon i tambe hopi interes pa empresariado i pa lantamentu di un propio empresa.

Kámara di Komèrsio i Industria Boneiru ta gradisí MBO Boneiru pa e konfiansa i e posibilidat pa organisá e tayernan akí i lo sigui komprometé su mes pa stimulá empresariado na Boneiru.