Empresarionan ta profundisá nan mes den enfoká riba kliente durante seshon di “The Next Step”

Kralendijk – Komo 25 empresario di diverso sektor resientemente a partisipá na e seshon di ‘Servisio na Kliente’ di e programa di kresementu ‘The Next Step’ di Kámara di Komersio Bonaire. Durante e enkuentro di interakshon a kompartí eksperensia i vishon tokante e importansia di amabilidat pa kliente, komunikashon profeshonal i servisio ekselente.

Trainer Aishel Granviel di Moving Forward B.V. a trata tópikonan manera satisfakshon di kliente, kumpra kliente, komunikashon efektivo i atendé profeshonalmente ku reklamo. Pa medio di ehèmpel di práktika i aktuashon simulá e partisipantenan a haña ehèmpelnan práktiko pa sigui mehorá nan kontakto ku klientela.

Konsehero di empresa i supervisor di programa Jían Magdalena tambe a toka e importansia di drenta kompletamente den e ròl di empresario. El a suprayá ku manehá un empresa ku enfoke riba servisio na kliente ta enserá mas akshon ku solamente kontakto ku klientela i ta eksigí tambe liderazgo konsiente i, kaminda ta aplikabel, embolbí empleadonan den un kultura di empresa ku enfoke riba kliente.

Durante e ehersisionan práktiko a dediká atenshon spesial na kanalnan di komunikashon digital, bou di nan WhatsApp Business. E partisipantenan a deliberá kon tambe pa medio di plataformanan informal nan por komuniká ku kliente di manera profeshonal, transparente i respetuoso.

Ku e seshon akí The Next Step ta sostené empresarionan den nan proseso di reforsá nan kalidat di enfoke riba kliente i kresementu duradero. Den esaki e enfoke ta fihá riba fortalesé e base di klientela, un di e tres pilarnan sentral di kresementu denter di e programa. Dor di invertí den bon servisio i relashon ku kliente, empresarionan ta konstruí un base di kliente fiel i un posishon mas fuerte riba merkado.

Tokante ‘The Next Step’
The Next Step ta e programa di kontinuashon riba e Sentro pa Empresario, un inisiativa di e Kámara di Komersio Bonaire den koperashon ku e Ministerio di Asuntu Ekonómiko i Klima, i e Servisio di Reino pa Empresa di Hulanda. Miéntras ku e programa di Sentro pa Empresario ta enfoká riba empresarionan inisial, The Next Step ta enfoká riba empresarionan (semi-)avansá.

Abo ta un un empresario (semi-) avansá anto bo ke traha na kontinuashon di kresementu di bo empresa? E ora ei registrá bo mes pa The Next Step i pone e siguiente paso den direkshon di bo metanan empresarial.