Kámara di Komèrsio Boneiru ta inspirá empresarionan hóben durante programa di fakansi di Buki di Prèt

E aña akí tambe ku hopi entusiasmo Kámara di Komèrsio a forma parti di e programa di fakansi di Buki di Prèt. Diessinku alumno di skol básiko den edat di 9 pa 13 aña a partisipá na e tayer interaktivo, ku e aña akí tabatin komo tema sentral ‘Mi propio mini empresa: for di idea te éksito!’

Na un manera dibertido i edukativo e muchanan a sera konosí ku e diferente formanan hurídiko i e sistema di traha di Kámara di Komèrsio Boneiru. Banda di esaki nan a siña kua ta e karakterístikanan ku ta importante pa un empresariado eksitoso, manera kreatividat, investigativo, enfoke, sea alerta i tuma responsabilidat.

Komo parti final di e tayer, e alumnonan mes a pone man na obra. Repartí den dos grupo, nan a krea nan propio konsepto di empresa huntu ku un logo i lema. Nan a elaborá esaki i nan a presentá nan ideanan na sobrá di e grupo. Hasiendo esaki nan a mustra ku mesora nan por apliká e konosementu ku nan a optené.

Kámara di Komèrsio Boneiru ta haña importante pa den un fase hopi tempran hasi e generashon hóben konsiente di e posibilidatnan di empresariado. Pa medio di na un manera inspirativo i aksesibel laga nos muchanan sera konosí ku lantamentu di un propio empresa, Kámara di Komèrsio ta spera di enkurashá nan pa desaroyá nan talentonan, nan ideanan i nan sentido empresarial mas aleu.

Pa mas informashon: bishitá nos wèpsait www.bonairechamber.com òf pasa un ratu serka nos. Bo por yama nos tambe na e number di telefòn 717 5595 òf manda un email na bis@kvkbonaire.com