KdK Boneiru a organisá su di dos One-Stop-Shop pa empresarionan aspirante i empresarionan ku ta kuminsando

E programa di Sentro pa Empresariado (Centrum voor Ondernemerschap – CvO) di Kámara di Komèrsio Boneiru a organisá e di dos edishon di One-Stop-Shop. Durante e evento informativo akí empresarionan aspirante i empresarionan ku ta kuminsando a haña un oportunidat úniko pa den un solo anochi hasi tur nan preguntanan na diferente instansia di gobièrnu i organisashon di sosten ku ta hunga un ròl importante na momentu di kuminsá ku un empresa i manehá esaki.

E presentenan por a bai direktamente den kòmbersashon ku representantenan di Servisio di Impuesto Hulanda Karibense (Belastingdienst), Qredits Bonaire, Servisio di Imigrashon i Naturalisashon (IND) i departamento di Asuntunan di Labor i departamento di Pèrmit di Trabou di Asuntunan Sosial i Empleo (SZW). Di e manera akí e bishitantenan a haña informashon balioso tokante entre otro impuesto, posibilidat di finansiamentu, pèrmit di estadia i pèrmit di trabou i leinan laboral.

Aunke e departamentu di Pèrmit di Establesimentu di Entidat Públiko Boneiru no por tabata presente, tabatin informashon relevante disponibel den forma di material di informashon ku a parti pa e bishitantenan.

Kámara di Komèrsio Boneiru mes tabata presente pa informá e bishitantenan tokante e sosten i e servisio di Sentro pa Empresariado. E programa ta ofresé guia, informashon i sosten práktiko na empresarionan ku ta poniendo nan promé pasonan den empresariado.

Kámara di Komèrsio a haña enkargo di Ministerio di Asuntunan Ekonómiko i di Servisio di Reino pa Hulanda Empresarial (Rijksdienst voor Ondernemend Nederland – RVO) pa desaroyá un programa di empresariado ku ta duna sosten na empresarionan nobo na momentu di desaroyo di nan empresa pa di e manera akí realisá un empresa viabel. E programa akí tin ku sòru pa serka empresarionan ta mihó konosí kua ta e yudansa ku nan tin mester i kua ta e abilidatnan ku nan tin ku desaroyá pa disponé di un empresa viabel.

Ku inisiativanan manera One-Stop-Shop, Kámara di Komèrsio Boneiru ta sigui komprometé su mes pa proveé empresarionan aspirante i empresarionan nobo ku informashon aksesibel i konfiabel. Pa medio di trese empresarionan na un momentu tempran den kontakto ku e instansianan korekto, nan por hasi eskohonan mihó informá i tuma un desishon bon konsiderá tokante kuminsamentu i desaroyo di nan empresa.

Bo ke mas informashon tokante pasonan spesífiko, òf bo tin pregunta tokante lantamentu di bo empresa? E ora ei tuma kontakto via ondernemerschap@kvkbonaire.com.