Protekshon di Medio Ambiente via IAB BES: Loke Kada Empresa Mester Sa

Punto di Informashon Medio Ambiente pa tur bo informashon tokante e legislashon nobo
E ‘Punto di Informashon Medio Ambiente’ ta un kolaborashon entre Entidat Públiko Boneiru, ministerio di Infrastruktura i Maneho di Awa i Kámara di Komèrsio Boneiru i e ta establesé den edifisio di Kámara di Komèrsio. E Punto di Informashon Medio Ambiente ta anhelá pa duna sosten na empresarionan i pa proveé nan ku informashon tokante e legislashon IAB BES (Dekreto di Establesimentu i Aktividat BES). Esaki lo tuma lugá pa medio di e lokèt di informashon, seshonnan di informashon i un instrumento ku ta den preparashon pa mesora duna bo un bista den kua tipo di sektor bo organisashon ta kai i kiko bo tin ku hasi pa kumpli ku e lei nobo.

E Lei VROM BES i IAB BES
Nos akshonnan tin konsekuensia direkto pa medio ambiente i nos ambiente di biba. For di uso di tereno pa agrikultura te determinashon di sitio pa konstrukshon, i asta nos métodonan pa maneho di shushi, tratamentu di awa shushi, produkshon di zonido i kon nos ta anda ku produktonan dañino – kada aspekto ta konta. Pa protehá nos ambiente a bini ku e Lei VROM BES, ku instrukshon pa ordenamentu teritorial, konstrukshon i protekshon di medio ambiente. E lei akí no ta pone responsabilidat solamente serka gobièrnu, pero serka habitantenan di e islanan BES tambe.

Pa empresanan tin otro reglanan di medio ambiente na vigor, stipulá den e Dekreto di Establesimentu i Aktividat BES (IAB BES). Riba e página akí bo ta deskubrí kiko e dekreto akí ta nifiká pa bo empresa.

Pero bou di kua tipo bo empresa ta kai? E dekreto ta distinguí kuater tipo di empresa, yamá tambe ‘establesimentu’:

  1. Tipo 1: Empresa ku regla general, sin obligashon di notifikashon.
  2. Tipo 2: Empresa ku regla general, pero ku obligashon di notifikashon.
  3. Tipo 3 i 4: Empresa ku tin mester di un pèrmit di medio ambiente.

Kua tipo di establesimentu bo empresa ta, ta dependé di e índole di e aktividatnan i nan impakto riba medio ambiente.

Empresa di tipo 1 i 2 por lo general tin un impakto limitá riba medio ambiente, manera ofisina, restorant òf garashi. Empresa di tipo 3 i 4 kontrario na esaki ta ehekutá aktividatnan kompleho òf potensialmente peligroso, manera empresa pa desmantelá outo òf terminal pa almasená petroli (oil terminal).

Pero kiko e reglanan general ei ta de fakto? Pa empresanan di tipo 1 i 2 e reglanan akí ta na vigor, ku ta varia for di maneho di shushi i tratamentu di awa shushi te prevenshon di kandela i almasenamentu di produkto peligroso. Banda di esaki tin instrukshon pa produkshon di zonido, limitashon di emishon i maneho di energia.

Bo ke sa mas tokante bo tipo di empresa i kiko e reglanan ta enserá? E lokèt di e Punto di Informashon Medio Ambiente ta disponibel pa pregunta di empresanan individual. Mas aleu ta anunsiá tur informashon via e kanalnan di informashon di Kámara di Komèrsio Boneiru.

E Punto di Informashon Medio Ambiente ta establesé den hal di Kámara di Komèrsio Boneiru na Kaya Amsterdam 23 i e ta habrí tur dia for di 08:00 or te 12:00 or. Pa informashon amplio bo por konsultá e wèpsait www.infomilcn.com.

Konseho i informashon

  • Kiko ta e diferensia entre praktiká un hòbi i un empresa?

    Por ta ku de bes en kuando bo ta hasi algu ku bo ta gana sèn kuné; drecha outo pa bo besiña, drecha port’i kurá òf yuda fèrf un kas. Den e kasonan ei no ta klarito si ta trata di un empresario. E suseso ta insidental i ounke tin un kompensashon p’e, e ta keda un aktuashon komo hòbi. E ta bira otro si bo bai drecha diferente outo, traha un kantidat di port’i kurá i fèrf diferente kas pa siman. E ora ei pokopoko pero sigur bo ta bai den direkshon di ta un empresario i bo tin ku inskribí bo mes komo empresa den registro komersial.

    Entre hasi algu komo hòbi i hasi negoshi tin un área grandi ku no ta masha kla. Laga nan informá bo na KvK  pa bo sa presis si bo ta empresario òf nò.   

  • Mi ta bai kuminsá un negoshi; mi ta obligá pa skirbi un plan di negoshi?

    Na promé lugá nos ta haña fantástiko ku bo ta bai hasi negoshi! Pa loke ta trata un plan di negoshi obligatorio e opinionnan ta varia. Tin hopi komersiante ku ta eksitoso ku nan empresa sin un plan di negoshi. Pero en general ta hopi konsehabel pa skirbi un bon plan di negoshi. Ku esaki bo ta sòru ku bo ta pensa bon tokante tur faseta di hasi negoshi, entre otro un bon investigashon di merkado i si e plan ta finansieramente realisabel. Tin sufisiente empresario ku a kuminsá muchu lihé i ku na kaminda a ripará ku nan a lubidá riba sierto aspektonan. Mirando ku 75% di tur negoshi rònt mundu dentro di 5 aña mester sera nan portanan ta konsehabel pa engrandesé bo oportunidatnan i pensa bon tokante e elementonan sumamente importante aki di bo futuro negoshi. KvK su konseho ta: si, semper skirbi un plan di negoshi!

    Si bo ke hasi un fiansa serka por ehèmpel un banko òf un instansia manera Qredits (finansiamentu mikro), e ora ei ta asta un obligashon pa skirbi un bon plan di negoshi. Sin e plan aki bo no ta haña fiansa.

  • Na unda mi por haña mas informashon tokante habrimentu di un negoshi?

    Riba internèt bo ta haña hopi informashon tokante tur faseta di hasi negoshi. Nan a skirbi masha hopi buki mes tokante kon bo ta bira un empresario eksitoso, ku tur posibel táktika aden. Pero bo no tin mester di buska asina leu fo’i kas, riba nos isla mes bo por haña sufisiente ehèmpel di empresarionan ku a anda eksitosamente ku e sirkumstansianan. Papia ku nan tokante esaki pa informá bo mes. Hopi biaha solushon ta mas serka bo òf mas simpel ku bo ta pensa.

    Pasa un ratu na KvK pa mas konseho òf informashon. Mientras bo ta gosa di un dushi kòfi gustosamente nos ta yuda bo den bo búskeda pa kontesta riba bo preguntanan!

  • Mi mester ta inskribí na Boneiru pa por habri un empresa na Boneiru?

    Nò, esei no nesesariamente mester ta e kaso. Si bo ta kuminsá ku un persona hurídiko (por ehèmpel BV òf NV) bo no mester ta residensiá na Boneiru. Pero si al kontrario bo skohe pa Negoshi Propio (EZ), e ora ei si bo mester ta inskribí na Boneiru. Pa mas informashon tokante e diferente formanan hurídiko, klek AKI (lenk pa Forma Hurídiko), tokante personanan hurídiko, klek AKI (lenk pa Persona Hurídiko) òf bo por pasa un ratu na KvK pa mas konseho.

No por a hañ’e?

O tuma kontakto ku nos

+599 717 5595

E number di telefòn ta alkansabel durante siman.

Djaluna - Djabierne
08.00 te ku 15:00
Email

Tuma kontako ku email