A finalisá Akshon di Kiosko di Isidel Beach Park Bonaire eksitosamente

E Sentro pa Empresariado (CvO), un programa di Kámara di Komèrsio i Industria Boneiru (KvK) i Bonaire Overheidsgebouwen (BOG), ta kontentu di por anunsiá ku e lo brinda sosten na e tres ganadónan di e kompetensia resien pa empresario na benefisio di Isidel Beach Park. Ta trata di Zaida Meneses Capillo di ‘Tradiciones Peruanas BV catering Factory Food & Drinks’, Francisco Zavala Guzman di ’Zenterprices’ i Tim Tromp di ‘The Fat Dog’.

E empresarionan lokal akí kada unu ta ofresé produktonan i servisionan úniko ku ta aportá na diversidat i sostenibilidat di nos ekonomia lokal. Kámara di Komèrsio ta sostené e tres ganadónan, ku a destaká ku nan plannan empresarial kreativo i sostenibel, ku tayer, kapasitashon i partisipashon na KvK Academy, ku ta bai ranka sali den luna di ougùstùs di e aña akí. Nan ta risibí tambe guia personal i akseso na un ret di empresario i profeshonal eksperensiá. Tur esaki pa krese ku nan kiosko den e ambiente úniko di Isidel Beach Park Bonaire.

Sentro pa Empresariado i Bonaire Overheidsgebouwen (BOG) ta orguyoso di e espíritu inovativo di e empresarionan akí i ta kere ku nan éksito lo kontribuí na Boneiru su desaroyo ekonómiko i un eksperensia úniko di bishitante den Isidel Beach Park.

Pa mas informashon tokante e sosten i aktividatnan di Sentro pa Empresariado bo por tuma kontakto ku departamento di BIS di Kámara di Komèrsio na e number di telefòn 717 5595 òf via email: ondernemerschap@kvkbonaire.com.  Pa tur informashon relevante tokante Isidel Beach Park Bonaire bo por bishitá e wèpsait www.isidelbeachpark.com.