Bishita di Ministerio di Asuntunan Ekonómiko i Maneho di Klima na Kámara di Komèrsio i Industria Boneiru

Riba djárason 27 di ougùstùs Irene Uitermark (direktor di Region i Espasio na Ministerio di Asuntunan Ekonómiko, Klima i Bèrdè) i Hamza Kacha (Mènedjer pa área hulandes karibense na Ministerio di Asuntunan Ekonómiko i Klima) a hasi un bishita na Kámara di Komèrsio i Industria Boneiru.

E punto kulminante di e dia tabata un seri di enkuentro ku empresarionan ku ta partisipá na e programanan di ‘Sentro pa Empresariado’ i ‘Sentro pa Empresariado Next Step’. For di e Ministerio di Asuntunan Ekonómiko i e Servisio di Reino pa Hulanda Empresarial, Kámara di Komèrsio a haña e tarea pa  desaroyá un programa di empresariado ku ta sostené empresarionan nobo ku desaroyo di nan empresa pa di e manera ei realisá un empresa viabel. E programa akí ta yuda empresarionan pa identifiká e tipo di ayudo ku nan tin mester i kua ta e abilidatnan ku nan tin ku desaroyá pa disponé di un empresa viabel.

Señora Uitermark i señor Kacha a haña un kaluroso bon biní i un rekorido atraves di e fasilidatnan i nan a papia ku kuater empresario ku kada un na nan propio manera a kontribuí na e paisahe empresarial di Boneiru:

• Donna Swanson di Betta Grasse – ku un bista nobo riba sostenibilidat i kultivo di su produktonan natural i biológiko.
• Maynard Cicilia di CHC Bonaire – fuerte den introdukshon di sandblasting.
• Marylou Felida – ku ta bai komprometé su mes ku kreashon di oportunidat di hunga pa e muchanan den un bario nobo, di parti di Kunuku Mágiko Boneiru ku ta ranka sali entrante novèmber 2025.
• Vaughan Astwood di Vinnova – aktivo ku guia di hóbennan i nan desaroyo.

Ku hopi interes ámbos bishitante a skucha nan storianan tokante oportunidat, desafio i aspirashon pa futuro. Nan a ekspresá nan apresio pa e kreatividat i perseveransia di e empresarionan i nan a enfatisá kon importante e tipo di inisiativanan akí ta pa nos komunidat.