Di soño pa inskripshon na Kámara di Komersio

Djamars tramèrdia último un grupo di alumno di Liseo Boneriano a inskribí komo empresa na Kámara di Komèrsio. Sr Troeman di Kámara di Komèrsio a splika e alumnonan e diferente formanan di empresa.

Na prinsipio di desèmber e alumnonan a kuminsá ku e tayer ‘Durf te dromen – Tribi na soña’ pa sera konosí ku empresariado. Despues di a ‘brainstorm’ hopi e grupo a bini ku e idea pa kuminsá ku un agensia di evento. Nan a wak e puntonan débil i e puntonan fuerte den e grupo, nan a wak kompetensia i tambe nan a hasi un investigashon di merkado.

Entretantu nan a establesé un empresa di bèrdat, nan a skohe un direktor, un nòmber i un emblema i nan a pone nan metanan riba papel.

E empresa ‘Sunset Events’ ta un agensia di evento ku komo grupo di enfoke hóbennan entre 14 i 18 aña. Na e momentunan aki tin tiki aktividat kaminda nan por rekreá i topa otro despues di ora di skol.

Den e simannan binidero nan ta sigui traha pa desaroyá un produkto, traha riba merkadeo i finalmente duna un presentashon pa nan mayor- i dosentenan.

Dos empresario, Wim Coster (ActionCoach) i Sylvia de Leon (ABC Online Media), a bini ku e tayer piloto aki ku e meta pa konbensé alumnonan di importansia di empresarionan lokal pa kresementu ekonómiko di nos isla. Ku hopi entusiasmo tantu Kámara di Komèrsio komo skol ta sigui progreso di e proyekto aki.

Artikulo original Bonaire.nu