Di tres sosten pa empresario for di EZK

Pa di tres biaha empresarionan na Hulanda Karibense por risibí un kompensashon pa gastunan fiho for di Ministerio di Asuntunan Ekonómiko i Klima (Economische Zaken en Klimaat, EZK). E kompensashon di EZK ta pa empresario ku tin di aber ku pèrdida di volúmen di benta pa motibu di e krísis di corona i ku pa e motibu ei tin mas difikultat di karga nan gastunan fiho. E montante di e kompensashon por varia entre $375 i $99.000 i ta kalkulá a base di sifranan di volúmen di benta.

Pa e di tres kompensashon aki, ta kompará e sifranan di volúmen di benta di e lunanan yüli, ougùstùs i sèptèmber 2020 ku e sifranan di volúmen di benta di e mesun lunanan na 2019. Pa por bini na remarke, e volúmen di benta mester a baha por lo ménos ku 30%. E faktor di kompensashon ta mas haltu ku e areglo di EZK previo; e tabata 0.5 i awor ta 0.75. Esei ta nifiká ku, den kaso di sifranan di volúmen di benta igual, empresarionan por bini na remarke pa un montante di kompensashon mas haltu.

Riba e wèpsait di RCN tin un módulo di kalkulashon nobo ku empresarionan por usa pa fásilmente kalkulá e montante ku nan lo por bini na remarke p’e. Den kaso ku e montante aki ta $6.000 òf mas, meskos ku tabata e kaso pa e di dos areglo, mester añadí un deklarashon di un tenedó di buki òf akountent independiente, pa konfirmá e sifranan kompletá.

Tur kondishon i informashon adishonal ta disponibel riba www.rijksdienstcn.com/covid-19 (bou di pakete di emergensia di gobièrnu). Por entregá formularionan kompletamente yená i firmá, huntu ku e aneksonan nesesario, te ku mas tardá djadumingu 31 di yanüari 2021 via e adrès di e-mail tegemoetkomingEZK@rijksdienstcn.com

Pa ayudo ku aplikashon por tuma kontakto ku Kámara di Komèrsio na Boneiru via di steunloket@kvkbonaire.com. Pa preguntanan urgente, por tuma kontakto via di telefòn ku unidat SZW di RCN via 781-5554 / 781-5558 (Boneiru), 790-0052 (Sint Eustatius) i 416-3804 (Saba).