E yabi pa éksito ta aki na Bonaire mes!

Direktiva nobo

Den su promé reunion di direktiva di aña 2018 Kámara di Komèrsio i Indústria a elegí un presidente i un vise-presidente nobo. Komo presidente a elegí un biaha mas sr H.H.M. Groot i komo vise-presidente a elegí sr H.J.L. Schoffelen. Sobrá di direktivá di Kámara di Komèrsio pa e aña aki ta konsistí di e siguiente miembronan: sr E.L. Piar, sr T. Verheul i sra N.S. Den Heyer i Direktor/Sekretario D.V. ter Burg.

Enfoke pa 2018

Plan di ehekushon lo ta e enfoke di Kámara di Komèrsio pa 2018. Un plan ku ta indiká konkretamente kiko mester hasi pa hasi  komunidat mas vital i sòru pa un impakto ekonómiko positivo. Ya pa muchu hopi tempu kaba únikamente ta hasi investigashon i publiká rapòrt, sin duna kumplimentu konkreto na esei. Sinembargo Kámara di Komèrsio no por hasi esaki e so, e lo tin ku trata na enbolbí su partnernan di kadena aserka.

Un di e partnernan di kadena na e momentu aki ta e gabinete hulandes nobo, ku a indiká di ta habrí pa koperashon ku i invershon den Boneiru. Kondishonnan ta bon gobernashon i gobernashon konfiabel i plannan konkreto ku ta ehekutabel i ku ta gosa di sosten ámplio. Riba e promé (bon gobernashon i gobernashon konfiabel) Kámara di Komèrsio no tin òf apenas tin influensia, riba esun di dos si. Sinembargo e yabi pa éksito no ta na Den Haag, esei tabata i te ainda ta aki riba nos isla.

Un di e prioridatnan pa Kámara di Komèrsio te ainda ta un vershon renobá di e plan maestro pa nos isla. Sigur awor ku tin un Plan Maestro Stratégiko pa Turismo mester bin un plan maestro ku ta riba esei. E plan aki mester ta den liña ku e resultadonan práktiko for di e Plan Maestro pa Turismo. Por usa e kaminda ku ‘Blue Destination’ a skohe hopi bon komo guia pa esaki. E plan práktiko i ehekutabel aki por ta e direkshon pa nos isla pa e añanan binidero. Esaki ta promé biaha ku Boneiru tin un plan manera esaki, ku un instituto renombrá ku investigadónan sumamente kapabel ku konosementu di e materia a skirbi. Kámara di Komèrsio ta hasi un apelashon fuerte riba Kolegio Ehekutivo pa no tarda ku aprobashon di e plan turístiko aki.

Preokupashon tokante desaroyonan resien

Ku desgustu  Kámara di Komersio tin ku sinta mira kon e Kolegio Ehekutivo aktual ta tuma desishonnan inkomprendibel riba algun área vulnerabel di nos ekonomia òf ta keda sin tuma esakinan. Aki mester pensa riba e situashon rondó di supsidio pa instansianan sosial i ekonómiko (e fundashon ku ta kai bou di Kámara di Komèrsio, enkargá ku stimulashon di desaroyo ekonómiko, tambe a risibí un gòlpi duru ku un rebaho di kasi 40%), e problemanan rondó di dirigentenan di BIA i e echo ku no a ekstendé kontrato di direktor di TCB. Di e manera aki nan ta atendé ku e sektornan mas esensial di nos ekonomia, (di kua BIA i TCB banda di esei a mustra tambe mehorashonnan evidente bou di guia di tur dos e direktornan).  Den bista di Kámara di Komèrsio esaki no solamente ta sin sentido, e ta krea tambe un imágen kompletamente robes serka invershonistanan i serka gobièrnu hulandes, pasobra e ta un atake direkto riba  konfiansa i transparensia pa futuro.

Artikulo original Bonaire.nu