Eksitoso enkuentro di The Next Step ta stimulá empresarionan pa pensa tokante liderazgo, personal i kon pa anda ku ousensia pa motibu di malesa

Kralendijk, Boneiru – Ku un asistensia di mas ku 35 empresario, resientemente na Plaza Beach Resort a tuma lugá un enkuentro inspirativo i interaktivo den e programa pa empresario The Next Step (E Siguiente Paso) di Kámara di Komèrsio Boneiru. E tema di e enkuentro, Empleabilidat Duradero: Liderazgo i Personal, a resultá sumamente relevante pa e empresarionan presente i a sòru pa vários diskushon, ehèmpel for di práktika i kompartimentu di konosementu balioso.

Personal ta forma un di e faktornan di mas importante pa éksito pa empresanan ku ta den kresementu. Na mes momentu hopi empresario ta eksperensiá diferente reto riba tereno di liderazgo, maneho di personal, komunikashon, motivashon i ousensia pa motibu di malesa. Pa sostené empresarionan den esaki, Kámara di Komèrsio Boneiru a organisá e enkuentro akí komo parti di e programa di The Next Step.

Apertura di e trámerdia a tuma lugá ku un seshon informativo di Jennefer Petersen di ‘House of Melati’, ku a hiba e presentenan den diferente aspekto di ousensia pa motibu di malesa den organisashonnan. Den esaki a bini dilanti entre otro e derechonan i obligashonnan di empleadonan den kaso di ousensia pa motibu di malesa, e impakto finansiero ku ousensia pa motibu di malesa por tin riba un empresa i importansia di protokòlnan interno klarito relashoná ku ousensia. Sra Petersen a dediká atenshon tambe na e Lei di Siguridat Laboral, e responsabilidatnan di dunadónan di trabou i e diferente ròlnan di e dòkter di seguro i e dòkter di trabou.

Seguidamente Inge Berben di ‘Berben & Colleagues’ a tene un tayer di liderazgo ekstenso i interaktivo. A base di su eksperensia amplio den vários funshon di hefe i komo empresario, el a kompartí konosementu balioso tokante e ròl krusial di liderazgo den un organisashon. Durante e seshon el a para ketu na e influensia ku konvikshonnan i balornan personal tin riba e manera di aktua di un dunadó di trabou den direkshon di su empleadonan. Banda di esaki nan a papia tambe tokante kon empresarionan por inspirá i konektá nan tim i duna guia na un manera efektivo na esaki, pa medio di komunikashon klarito tokante nan vishon, mishon i espektativanan.

E enkuentro a karakteristiká su mes pa medio di un grado haltu di interakshon. E empresarionan a bai aktivamente den kòmbersashon ku otro i ku e oradornan tokante desafionan aktual den nan organisashonnan. Prinsipalmente e tópikonan di personal, liderazgo, komunikashon i ousensia pa motibu di malesa, a lanta hopi pregunta i interes.

E enbolbimentu grandi di e partisipantenan ta konfirmá ku e temanan akí ta biba fuertemente den nos mundu empresarial lokal. Relashoná ku e hopi preguntanan i diskushonnan balioso, Kámara di Komèrsio Boneiru ta investigá e posibilidatnan pa den futuro serkano organisá enkuentronan adishonal rònt di e tópikonan spesífiko ku a bini dilanti durante e seshon akí.

Tokante ‘The Next Step’

The Next Step ta un programa di desaroyo di Kámara di Komèrsio Boneiru ku ta sostené empresarionan ku e siguiente fase di kresementu di nan empresa. Pa medio di kapasitashon, tayer, enkuentro di konosementu i guia, e partisipantenan ta haña vários hèrmènt práktiko pa sigui profeshonalisá nan empresa i laga esaki krese na un manera duradero.

Empresarionan ku ta interesá den partisipashon na e programa òf ku ke risibí mas informashon, por tuma kontakto via bis@kvkbonaire.com òf nan por pasa personalmente na Kámara di Komèrsio Boneiru na Kaya Amsterdam 23.