Eksitoso Mishon Komersial ‘Dutch Caribbean Meets Panama 2025’

Kralendijk, 19 di febrüari 2025 – Kámara di Komèrsio Boneiru a partisipá eksitosamente na e Mishon Komersial ‘Dutch Caribbean Meets Panama 2025’ ku komo meta pa promové komèrsio entre Panama i henter Reino Hulandes. Esaki a tuma lugá for di 12 te 14 di febrüari 2025.

Kámara di Komèrsio Boneiru a promové e mishon komersial serka e empresarionan i segun Holland House Panama resultado di esaki tabata ku mas ku 75 partisipante i mas ku 30 organisashon for di Boneiru, Saba, St Eustatius, Aruba, Kòrsou i St Maarten a partisipá na e mishon komersial. Durante e evento akí nan a eksplorá e posibilidatnan na Panama i nan a hasi konekshonnan balioso.

Durante e tres dianan e partisipantenan a partisipá na seshonnan di ‘matchmaking’, kòmbersashonnan di mesa rondó i nan a asistí na seminarnan ku ta brinda konosementu tokante hasimentu di negoshi na Panama. Un tema importante den esaki tabata e ròl di digitalisashon den e klima moderno di empresariado. Durante e ‘matchmaking’ Kámara di Komèrsio Boneiru a hasi diferente bishita na entre otro organisashonnan logístiko i ProPanama pa haña mas konosementu di e tráfiko ekonómiko di Panama.

Durante e diferente oportunidatnan di ‘netwerk’ i enkuentronan informal, Kámara di Komèrsio Boneiru a papia ku e diferente Kámaranan di Komèrsio tokante e desafionan ku nan ta topa riba tereno di empresariado i registro (registro komersial i registro di UBO). Na e okashonnan akí nan a interkambiá di idea, konosementu i vishon, loke ta e base pa mas kolaborashon i kompartimentu di konosementu den e parti karibense di Reino.

Kámara di Komèrsio Boneiru ta gradisí tur partisipante, Holland House Panama i Gabinete di Enviado Spesial pa e mishon komersial eksitoso akí.