Empresariado na skol

Kámara di Komèrsio i Kolegio Rayo di Solo / Strea Briante ta kuminsá ku un edishon nobo di ‘Empresariado na Skol’. Kolegio Rayo di Solo i Kolegio Strea Briante a pidi Kámara di Komèrsio un biaha mas pa tuma e lèsnan na su enkargo. Alumno(a)nan di grupo 8 ta haña lès riba tereno di hasi negoshi di parti di Kámara di Komèrsio i otro organisashonnan importante. Durante e lèsnan nan ta siña hasi negoshi, demostrá liderazgo, traha huntu i pensa inovativamente.

Na final di e aña eskolar lo wak huntu ku e muchanan kon nan ta mira futuro di nan isla i a base di nan propio vishon nan ta bai krea e Boneiru di mañan: un isla Blue Destination. Finalmente e muchanan lo presentá esaki tambe na un públiko. Kámara di Komèrsio ke ekstendé e lèsnan tambe pa otro skolnan.

Muchanan di awor ta e diseñadónan di futuro. Esaki ta konta pa henter mundu, pero netamente pa Boneiru ta importante pa dediká atenshon na esaki. Nos isla ta den desaroyo i si nos ke sòru pa esei kana bon pa nos naturalesa, nos kultura i nos ekonomia, e ora ei for di awor nos mester wak den direkshon di futuro.  Mas ku niun otro Kámara di Komèrsio sa esaki i pa e motibu aki den kuadro di Blue Destination nos a bini ku e programa pa hoben ‘Empresariado na Skol’.

E aña aki a adaptá e lèsnan na e medidanan di COVID-19 na nos isla. Esaki ta nifiká ku ta duna e parti mas grandi di e lèsnan na skol mes na lugá di na un sitio pafó di skol ku tin di haber ku tópiko di e lès, esaki teniendo kuenta ku tur protokòl di COVID-19.