Introdukshon sistema online nobo di Registro Komersial

Riba término kòrtiku Kámara di Komèrsio ta introdusí e Registro Komersial online nobo. Ku esaki nos ta logra ku Boneiru tin un Registro Komersial ku:

• ta mas mihó aksesibel digitalmente pa tur hende,
• ta hasi posibel pa manehá e datonan di un inskripshon den Registro Komersial digitalmente,
• tin un fasilidat di pago online, i
• ta hasi posibel pa nos amplia i mehorá nos servisio mas aleu.

Tene nos kanalnan di medionan sosial na bista durante e simannan binidero

Esaki pasobra durante e simannan binidero nos ta bai publiká informashon tokante asuntunan manera:

• kon bo por ‘log in’ pa buska dato den Registro Komersial,
• kon gerentenan por optené e ‘access code’ ku kua nan por manehá nan inskripshon den Registro Komersial digitalmente, i kon esei ta funshoná.

Bo ta gerente di un organisashon ku ta inskribí na Kámara di Komèrsio Boneiru i durante e último lunanan bo no a risibí email di nos?

Bo ke tuma kontakto e ora ei ku Kàmara di Komèrsio pa kontrolá si e emailadres ku ta registrá pa bo ta korekto ainda? (yama nos òf manda nos un email na handelsregister@kvkbonaire.com, òf pasa serka nos un ratu!)

Bo ta gerente di un organisashon i bo no tin un emailadrès of esaki no ta konosí na Kámara di Komèrsio?

E ora ei probablemente dentro di poko bo ta risibí un karta di nos. Pero bo tambe turesten por tuma kontakto ku nos (yama nos òf pasa un ratu serka nos!). E ora ei nos por hasi palabrashon kon den futuro nos por tin kontakto ku otro tokante bo inskripshon den Registro Komersial.