Kámara di Komèrsio a organisá seshon di informashon pa Asosiashon di Chines na Boneiru den kolaborashon ku HBN Law & Tax

Boneiru, 3 di febrüari 2025 – Riba djaluna 3 di febrüari 2025 Kámara di Komèrsio huntu ku HBN Law & Tax a organisá un seshon di informashon eksitoso pa e Asosiashon di Chines na Boneiru. A tene e seshon komo reakshon riba un súplika di señora Jiamin Wu, presidente di e Asosiashon di Chines, ku a indiká ku den komunidat chines tin hopi demanda pa informashon tokante asuntunan di impuesto na nos isla.

E seshon ku tabata bou di guia di Jorik Julsing i Lucas Drissen di HBN Law & Tax, a ofresé un splikashon detayá tokante diferente aspekto di impuesto ku ta relevante pa empresarionan na Boneiru, entre otro e ‘Algemene Bestedingsbelasting – ABB’, impuesto riba sueldo i impuesto riba bien inmóbil. Tambe nan a papia tokante e kambionan mas importante pa e aña di impuesto 2025. Señora Wu a fungi komo traduktor pa sòru ku tur partisipante por a komprendé e informashon bon.

For di aña 2024 Kámara di Komèrsio a kuminsá ku un kolaborashon struktural ku HBN Law & Tax, kaminda regularmente ta organisá seshon di informashon pa duna sosten na empresarionan na nos isla den kaso di problemátikanan di impuesto. E inisiativa akí ta kuadra ku e vishon mas amplio di Kámara di Komèrsio pa yuda empresarionan desaroyá nan mes i ser eksitoso den nan maneho empresarial, pa medio di brinda nan mihó konosementu di nan derechonan i obligashonnan.

E seshon di informashon tabata bon bishitá di parti di mas òf ménos 20 empresario chines, ku tur por a hasi nan preguntanan tokante asuntunan di impuesto i ku a bai kas ku vários hèrmènt práktiko pa den un forma korekto atendé ku nan asuntunan di impuesto.

Kámara di Komèrsio i HBN Law & Tax tin intenshon pa den e lunanan binidero organisá mas di e tipo di seshonnan di informashon akí, ku enfoke riba diferente grupo di enfoke na Boneiru, pa di e manera akí duna sosten na mas empresario ku kumplimentu ku nan obligashonnan di impuesto i ku optimalisashon di nan maneho empresarial.