Kámara di Komèrsio ta tene tres tayer inspirativo tokante empresariado pa MBO nivel 2 i 3 na SGB Boneiru

Den kuadro di e lèsnan tokante komportashon empresarial, Kámara di Komèrsio i Industria Boneiru resientemente a tene tres tayer interaktivo pa studiantenan di MBO nivel 2 i 3 na Scholengemeenschap Bonaire (SGB). E seshonnan akí ta forma parti di e materia ‘suidadania i empresariado’ i tabatin komo meta pa laga hóbennan den un forma aksesibel sera konosí ku mundu di empresariado.

Durante e tayernan nan a trata tópikonan importante, manera rekonosé oportunidat, desaroyá un aktitut empresarial, i pone e promé pasonan den direkshon di lantamentu di un empresa propio. E studiantenan a haña espasio pa hasi pregunta, presentá nan ideanan i pensa huntu tokante solushonnan pa problemanan real ku un empresario por konfrontá.

Kámara di Komèrsio ta haña ku ta esensial ku hóbennan no ta siña solamente den klas tokante empresariado, pero ku nan ta bini den kontakto tambe ku práktika i ku nan ta keda inspirá pa medio di eksperensianan real. Si den un fase tempran bo laga hóbennan mira ku empresariado ta un opshon faktibel i interesante, bo no ta duna nan solamente konosementu, pero konfiansa propio di motivashon tambe.

Kámara di Komèrsio ta sigui komprometé su mes pa stimulá i motivá hóbennan di Boneiru pa bai tras di nan soñonan. Empresariado ta brinda hóbennan un posibilidat pa tuma inisiativa, karga responsabilidat i duna un aporte positivo na nos komunidat lokal. Ku e tayernan akí Kámara di Komèrsio ta spera di no solamente traspasá konosementu, pero tambe sende un chispa ku por krese i bira berdadero kapasidat empresarial.

Kámara di Komèrsio ta eksperensiá e kolaborashon ku SGB komo sumamente balioso i ámbos partido ta ansioso pa huntu sigui ku mas aktividat ku ta kontribuí na desaroyo personal i profeshonal di nos hóbennan boneriano.

Bo ke haña mas informashon tokante kiko Kámara di Komèrsio por nifiká pa bo? Manda un email pa nos na bis@kvkbonaire.com. Via telefòn nos ta alkansabel riba 717 – 5595. Bo por pasa personalmente tambe na Kaya Amsterdam 23. Nos ta habrí nònstòp riba djaluna te ku djabièrnè for di 08:00 or te 15:00 or.