Komunikado pa prensa – Enkuentro di Blue Destination

Riba djabièrnè 15 di yüli Kámara di Komèrsio i Industria Boneiru, huntu ku BONHATA i TCB a organisá un eksitoso enkuentro di sertifikashon Blue Destination na Delfins Beach Resort. Mas ku 80 empresa i 125 empresario interesá ku ta operashonal den diferente sektor tabata presente. Entre otro akomodashon, kompania di hür outo, hóreka, ofisina di servisio, pero tambe otro tipo di empresa.

Kada empresa na Boneiru, grandi òf chikitu, por hunga un ròl aktivo den sostenibilisashon. Pensa por ehèmpel riba eskohonan konsiente di medio ambiente na momentu di kompra di produkto, prosesamentu di shushi òf uso di awa. Kuida bo personal bon, informá i konsientisá kliente òf sòru pa un ambiente seif i limpi tambe ta kontribuí na Boneiru komo Blue Destination. A desaroyá e Sertifikashon Blue Destination pa informá, guia i premia empresanan i organisashonnan riba nan kaminda pa un operashon mas sostenibel i mas sosial. Boneiru komo Blue Destination ta aspirá pa yega na un sinergia perfekto entre naturalesa, kultura i ekonomia. Ta protehá i alabes utilisá e rekursonan natural, manera e oséano ku ta rondoná nos isla. Boneiru komo Blue Destination ta krea un identidat i un eksperensia úniko, ku ta distinguí Boneiru for di otro islanan karibense. Blue Destination ta promové loke Boneiru ta para p’é i ta yuda atraé bishitantenan ku ta kompartí e balornan akí.

Durante e seshon di informashon akí Kámara di Komèrsio a duna masha hopi splikashon tokante e bentahanan i tambe tokante e proseso di e Sertifikashon Blue Destination. Aktualmente tin en total 12 empresario ku ta sertifiká Blue Destination i banda di esei ainda tin un kantidat di empresario ku ta okupando nan mes ku e proseso di sertifikashon. Kámara di Komèrsio, BONHATA i TCB ta spera ku vários empresario ta bai kuminsá ku e trayekto di sertifikashon, mirando e efekto positivo di esaki pa sostenibilidat di Boneiru. Pa motibu di e kantidat grandi di hende ku a registrá pa partisipashon, a disidí pa plania un seshon di informashon di kontinuashon. Pronto lo anunsiá ki dia esaki ta bai tuma lugá. Nos ta supliká bo pa keda tene e wèpsait di Blue Destination i e página di Facebook di Blue Destination na bista. Manda un email na info@bluedestination.com òf tuma kontakto ku nos departamento di BIS na 717 5595 tambe ta forma parti di e posibilidatnan.

MASHA DANKI na tur hende ku tabata presente i laga nos huntu hasi Boneiru mas sostenibel