Dec 02
Notisia

KvK Academy ta entregá sertifikado na 38 partisipante durante enkuentro festivo

Den un ambiente kaluroso i inspirativo Kámara di Komèrsio Boneiru (KdK) djaweps ùltimo 27 di novèmber a honra 38 partisipante ku eksitosamente a risibí nan sertifikado di KvK Academy. E enkuentro festivo a forma klousura di un periodo intensivo di siñamentu, kresementu i trabou di ret, kaminda e partisipantenan a fortifiká nan abilidatnan empresarial mas aleu.

Ku orguyo Kámara di Komèrsio ta aksentuá ku e edishon akí di KvK Academy un biaha mas a mustra kuantu potensial i ambishon tin den nos komunidat. E partisipantenan a konsentrá riba un variedat di tema dentro di empresariado i desaroyo personal, i pa medio di vários presentashon i tarea nan tabata sa di hasi nan kresementu visibel.

Kámara di Komèrsio ta ekspresá su gratitut spesial na tur e spònsernan ku a yuda hasi e programa akí posibel, esta:

Entidat Públiko Boneiru (OLB), MCB Bonaire, Cactus Accounting Services, Rocargo Services, Sentro di Salú Bon Bida, TELBO N.V., City Shop, Obersi Electronics Bonaire i Nynedroid Driving School. Danki na nan enbolbimentu i sosten e premionan di kalidat haltu pa e ganadónan por a bira realidat.

Durante e seremonia nos a pone e tres partisipantenan ku a presta mihó den spòtlait.

  • E ganadó, Jurdine Felix, a risibí un pakete di premio balioso ku Entidat Públiko Boneiru (OLB), Rocargo Services, Sentro di Salú Bon Bida, TELBO N.V., City Shop, Obersi Electronics Bonaire i Nynedroid Driving School a opsekiá.
  • E promé finalista, Ragnhild Isabella, a risibí su premio for di MCB Bonaire.
  • E di dos finalista, Ludvarina Valerio, a keda rekompensá ku e premio ku Cactus Accounting Services a pone disponibel.

Kámara di Komèrsio ta enfatisá ku éksito di KvK Academy lo no tabata posibel sin e dedikashon inkansabel i ekspertisio di su treinernan. Nan guia, motivashon i konosementu profeshonal a hunga un ròl krusial den e proseso di kresementu di e partisipantenan. Pa e motibu akí Kámara di Komèrsio ta ekspresá su sinsero apresio pa tur hende ku a kontribuí na e edishon eksitoso akí.

Ku finalisashon di e ròndu di kapasitashon akí, ku konfiansa Kámara di Komèrsio ta spera e siguiente edishonnan di KvK Academy, kaminda kada biaha mas empresario i profeshonal ta haña oportunidat pa sigui desaroyá nan mes mas aleu i pa kontribuí na un Boneiru empresarial mas fuerte.