KvK ta kla pa sirbibo den 2021!

Na nòmber di personal, direktor i direktiva di Kámara di Komèrsio Boneiru nos ta deseá bo un aña 2021 eksitoso, empresarial, riku na resultado i saludabel.  Durante aña 2020 Kámara di Komèrsio a traha ku hopi dedikashon pa por kumpli ku bo nesesidatnan i pa por ofresé bo e sosten nesesario. Kámara di Komèrsio ta wak bèk riba un aña kaminda el a ofresé e siguiente formanan di sosten:

Relatá na COVD-19

• Introdukshon di un lokèt di sosten pa konseho tokante medidanan di sosten ku Hulanda Oropeo i otro instansianan (manera Qredits, Entidat Públiko Boneiru i Servisio di Impuesto Hulanda Karibense) a bini kuné. Pa esaki en total nos a kontestá 1196 imeil.
• Via telefon nos a buska kontakto ku empresarionan pa skucha nan prekupashonan i pa wak kua sosten adishonal nos por a ofresé.
• Regularmente nos a konsultá ku gobièrnu lokal i e ministerionan hulandes tokante entre otro e medidanan di COVID-19.
• Nos a lucha pa introdukshon di un variante èkstra pa e medida di sosten di Asuntunan Ekonómiko i Klima ‘Kompensashon pa Gastunan Fiho’ di $2200 pa empresarionan chikitu.
• Introdukshon di un ‘Virus Aware Seal’ huntu ku Servisio di Reino pa Hulanda Empresarial (Rijksdienst voor Ondernemend Nederland – RVO) i Green Destinations. Esaki ta keda emití komo un seyo di kalidat na momentu ku empresarionan a tuma e medidanan nesesario pa kumpli ku e protokòlnan pa anda eksitosamente ku vírùs, entre otro COVID-19.
• Nos a tene un enkuesta representativo bou di empresarionan di Boneiru pa inventarisá nan desafionan, nan ekspektativanan i e impakto riba nan operashon komersial.
• Nos a hiba kòmbersashon ku sekretario di estado Knops pa trese e efektonan negativo di Corona serka empresarionan i e nesesidat di medidanan di sosten bou di su atenshon.

No relatá na COVID-19

• Nos a hiba kòmbersashon ku e delegashon di Tweede Kamer ku na komienso di aña 2020 tabata di bishita serka Kámara di Komèrsio, pa di e manera ei duna un bista di e puntonan problemátiko riba tereno di empresariado na Boneiru.
• Prosesamentu di 566 inskripshon nobo den Registro Komersial.
• Partisipashon na diferente plataforma di konsulta, manera Diálogo Sentral, grupo di direkshon Blue Destination, Plataforma Insular pa Kombatimentu di Kriminalidat, Grupo di trabou Transakshon di Pago Hulanda Karibense, Plan Maestro 2030 i Plan di Rekuperashon di Turismo, kaminda kontinuamente a trese interesnan di empresarionan dilanti.
• Nos a duna guia na ‘start-ups’ i trese nan den kontakto ku invershonistanan pa medio di e programa di ‘present your start-up’.
• Nos a organisá diferente kampaña pa engrandesé konsientisashon di Blue Destination riba tereno di kultura, inkluso lansamentu di e sertifikashon di Blue Destination pa empresarionan.
• Lansamentu di KvK Academy komo kuríkulo di treinen pa engrandesé e chènsnan pa éksito pa empresarionan.
• Nos a organisá un Crisis Management Seminar komo sosten pa empresarionan ku enfoke riba kon pa anda ku kontratempu riba tereno empresarial.
• Nos a intensivá e kontaktonan ku diferente ‘stakeholder’ ku ta relevante pa trabou di Kámara di Komèrsio, manera Entidat Públiko Boneiru, Direktorado di Planifikashon i Desaroyo, Ministerio di Asuntunan Sosial i Empleo, Plenchi di Trabou, Servisio di Impuesto Hulanda Karibense, Ministerio di Asuntunan Ekonómiko i Klima, Servisio di Imigrashon i Naturalisashon etc.
• Nos a duna kontesta riba un total di 391 petishon pa informashon i yamada di kliente ku pregunta tokante kon pa kuminsá un empresa i/òf tokante ora un persona ke establesé su mes na Boneiru.
• Nos a organisá seshonnan di informashon den koperashon ku Servisio di Impuesto Hulanda Karibense tokante diferente tipo di impuesto ku ta relevante pa empresarionan.
• Stimulashon di empresariado na skol mediante seshonnan di informashon na Kolegio Rayo di Solo, Strea Briante, MBO i Liseo Boneriano.

E wèpsait di Kámara di Komèrsio ku 8200 ‘pageview’ i nos medionan sosial ku mas di 2000 siguidó durante aña 2020 tambe a resultá fuentenan importante di informashon pa empresarionan.

Durante aña 2021 tambe bo por konta ku e tim di Kámara di Komèrsio pa sosten, guia i atendementu di bo interesnan. Un biaha mas nos ta manda un saludo empresarial di Aña Nobo di parti di personal, direktor i direktiva di Kámara di Komèrsio!