No opstante COVID-19 tòg e proyekto Empresariado na MBO aña eskolar 2019 – 2020 a finalisá eksitosamente

Komo estímulo pa aktividat empresarial riba nos isla desde 2018 Kámara di Komèrsio a kuminsá duna entrenamentu na skol pa motivá komportashon empresarial serka nos hóbennan i studiantenan. Pa esaki a desaroyá un kuríkulo spesial, den kua ta hasi e partisipantenan atento ku nan tambe lo por kuminsá nan propio empresa, enbes di drenta servisio komo empleado na un empresa. A inkluí e konsepto di ‘Blue Destination’ tambe den esaki pa duna atenshon na e aspekto sostenibel di nos isla. Inisialmente a duna e kuríkulo aki na nos skolnan básiko i pa motibu di éksito di esaki, a ampliá e proyekto tambe te na MBO.

E proyekto ta sirbi komo empuhe pa studiantenan ku den futuro, despues di nan estudio, ke bira empresario. Dentro di e proyekto na MBO, meskos ku tabata e kaso na nos skolnan básiko, a traha ku diferente partner for di diferente sektor, manera Stinapa, TCB, Mangazina di Rei, Blue Destination i Selibon NV, di manera ku por a interkambiá informashon práktiko. Durante e trayekto aki ta reta e studiantenan pa pensa komersialmente i desaroyá liderazgo i alabes ta promové nan kapasidat pa traha huntu. Na mes momentu ta desafiá nan pa ser kreativo i pensa solushonnan inovativo.

Pa e aña eskolar aktual a inisiá e proyekto aki, ku ta konsistí di 10 módulo, na ougùstùs 2019 i en prinsipio mester a kontinuá kuné durante henter e aña eskolar. Sinembargo, pa motibu ku a sera tur skol relashoná ku e Ordenansa di Emergensia COVID-19, no tabata posibel pa ehekutá esaki konforme e planifikashon. Debí na esaki a organisá e finalisashon den un forma adaptá dia 19 di yüni 2020. Riba e dia ei studiantenan di kuater diferente formashon di MBO Boneiru a presentá nan plan di negoshi na Gezaghèber Edison Rijna i representantenan di Kámara di Komèrsio, Qredits i Cargill. Tur esnan presente a keda sumamente impreshoná pa e kualidatnan di e studiantenan i a opservá ku Boneiru tin masha hopi potensial empresarial.

Kámara di Komèrsio tin intenshon pa kontinuá ku e inisiativa hopi importante aki durante e aña eskolar binidero tambe i ta bai drenta kòmbersashon ku e sobrá skolnan tokante esaki. Kámara di Komèrsio t’ei pa duna sosten na empresanan eksistente, pero pa empresarionan di futuro tambe. Pa e motibu aki Kámara di Komèrsio ta sigui invertí den nos hóbennan i ta anhelá pa ampliá Empresariado na Skol mas aleu.