Seshon di informashon transparente i balioso: “Komprendé CPI i hasi uso di dje den práktika”

Riba djaluna 8 di yüni 2026 Ofisina Sentral di Estadístika Hulanda Karibense (CBS), den kolaborashon ku Kámara di Komèrsio i Industria Boneiru (KdK Boneiru) a organisá un seshon transparente i balioso ku komo tema “Komprendé CPI i hasi uso di dje den práktika”. E partisipantenan a risibí e enkuentro ku hopi entusiasmo.

Durante e seshon di informashon e partisipantenan a haña konosementu den e manera ku e Índise di Preis di Konsumidó (Consumentenprijsindex – CPI) ta keda realisá, kon nan por interpretá e sifranan disponibel korektamente i kon nan por hasi uso di e informashonnan akí pa stipulashon di maneho, planifikashon i toma di desishon. Den un klima empresarial kaminda mas i mas biaha nan ta basa maneho riba dato i tendensia, konosementu di CPI ta ofresé empresarionan un instrumento importante pa komprendé e desaroyonan mas mihó i reakshoná riba esakinan pa loke ta trata struktura di gastu, preis i benta.

Mas aleu nan a haña informashon tokante kon nan por konsultá e informashonnan akí den e portal di Ofisina Sentral di Estadístika (CBS). Banda di esaki a dediká atenshon na otro informashonnan ku por ta relevante pa mehorashon di nan operashon empresarial, basá riba konosementu di demografia di poblashon, preis, bienestar i desaroyonan regional.

E tópikonan ku a bini dilanti tabata:

• Kiko ta e índise di Preis di Konsumidó (CPI) i kon ta hinka esaki den otro.
• Kon ta interpretá e sifranan di CPI korektamente i apliká nan den un empresa.
• Na unda por haña dato konfiabel di CPI.
• Uso di dato di CPI pa maneho, presupuesto i evaluashon.
• Vários ehempel di aplikashon di CPI den práktika diario.
• Konosementu di otro datonan i sifranan di Ofisina Sentral di Estadístika Hulanda Karibense ku ta disponibel i kon pa hasi uso di esakinan.

Ku satisfakshon Kámara di Komèrsio i Industria Boneiru ta wak bèk riba e seshon informativo akí i ta sigui komprometé su mes pa organisá enkuentro ku ta di balor agregá pa empresarionan, institutonan i organisashonnan ku ta registrá den Registro Komersial. Kámara di Komèrsio ta ekspresá su gratitut na e representantenan di Ofisina Sentral di Estadístika Hulanda Karibense pa nan presentashon eksperto, nan entusiasmo i nan profeshonalidat.

Ofisina Sentral di Estadístika ta e kolektadó ofisial di dato i produktor di estadístika pa Hulanda Karibense.